جاڭا ۇلتتىق دامۋ جوسپارىن ازىرلەۋ قاجەت. بۇل تۋرالى ەلىمىزدىڭ الەۋمەتتىك-ەكونوميكالىق دامۋى جونىندەگى كەڭەستە مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءقازىر مەملەكەتتىك جوسپارلاۋ جۇيەسىندە 163 قۇجات بار. ونىڭ ءارقايسىسى ورتاشا العاندا 40 ءىس-شارانى قامتيدى. 2010 جىلدان بەرى سوزىلىپ كەلە جاتقان تاپسىرمالار بار. تاپسىرمالاردىڭ وزەكتىلىگىن قايتادان مۇقيات قاراۋ قاجەت. قاعازباستىلىق كەرەك ەمەس. مەن سوڭعى كەزدەگى جاھاندىق ۇردىستەردى ەسكەرىپ، 2050-ستراتەگياسىن جاڭارتۋدى تاپسىردىم. بۇل ۇزاق مەرزىمگە ارنالعان قۇجات بولۋى ءتيىس. وندا الەۋمەتتىك-ەكونوميكالىق جانە قوعامدىق-ساياسي دامۋ جولىنداعى نەگىزگى باسىمدىقتار ايقىندالۋى كەرەك»، – دەدى قاسىم-جومارت توقايەۆ.
پرەزيدەنت 2025 جىلعا دەيىنگى ۇلتتىق دامۋ جوسپارى وزەكتىلىگىن جوعالتتى دەپ ويلايتىندىعىن باسا ايتتى.
«سول سەبەپتى جاڭا قۇجات ازىرلەۋ قاجەت. وندا ەلىمىزدىڭ ورتا مەرزىمگە ارنالعان ماقسات-مىندەتتەرى ناقتى بەلگىلەنۋگە ءتيىس. بۇل قۇجات مەملەكەتىمىزدى دامىتۋعا قاتىستى بارلىق ماسەلەنى قامتۋى قاجەت. سايلاۋ الدىنداعى باعدارلامام دا ەسكەرىلۋى كەرەك. وعان ءماجىلىس سايلاۋىندا جەڭىسكە جەتكەن «امانات» پارتياسى باعدارلاماسىنىڭ نەگىزگى تۇستارىن قوسقان ءجون. باسقا پارتيالاردىڭ ورىندى ۇسىنىستارىنا دا باسا ءمان بەرگەن ابزال»، – دەدى مەملەكەت باسشىسى.