ۇلتتىق بانك قىزمەتكەرلەرى مەسسەندجەر ارقىلى اۋديو جانە بەينەقوڭىراۋ شالمايدى.
ۇلتتىق بانك ازاماتتارعا ماڭىزدى مالىمدەمە جاسادى، دەپ حابارلايدى Almaty-akshamy.kz
قازاقستان ۇلتتىق بانكى قوس قادامنان تۇراتىن الاياقتىق جاعدايلاردىڭ جيىلەپ كەتكەنىن ەسكەرتتى.
ۆەدومستۆونىڭ حابارلاۋىنشا، ءبىرىنشى كەزەڭدە قاسكويلەر ءوزىن ۇلتتىق بانكتىڭ نەمەسە باسقا دا مەملەكەتتىك جانە قۇقىق قورعاۋ ورگاندارىنىڭ قىزمەتكەرى رەتىندە تانىستىرىپ، جالعان قۇجات جىبەرەدى. ءسويتىپ بانكتىك اۋدارىمدارعا ارنالعان دەرەكتەمە ۇسىنىپ، ازاماتتاردان بارىنشا اقشا ءوندىرىپ الۋعا تىرىسادى.
"الاياقتار قاراجاتتى يەمدەنىپ العان سوڭ الاياقتىق سحەمانىڭ كەلەسى كەزەڭىنە كوشەدى. بۇل جولى وزدەرىن زاڭگەر رەتىندە تانىستىرىپ، اڭعال ازاماتتارمەن قايتا بايلانىس ورناتادى. ءوزى سەكىلدى زارداپ شەككەن باسقا دا ادامداردىڭ اتىنان ۇجىمدىق تالاپ-ارىزبەن ارەكەت ەتەتىن سىڭاي تانىتىپ، الاياقتار يەمدەنىپ كەتكەن قاراجاتتى قايتارۋعا زاڭگەرلىك كومەك ۇسىنادى. وسىلايشا، قاسكويلەر اقشالاردى قايتارۋ ءۇشىن "زاڭگەرلىك قىزمەتكە" اقى تولەۋدى سۇرايدى"، دەلىنگەن ق ر ۇلتتىق بانكى تاراتقان اقپاراتتا.
اقشالاي ترانزاكسيا ورىندالعان سوڭ الاياقتار بايلانىسقا شىعۋدى توقتاتادى.
ەسكە سالا كەتەتىن جايت، ۇلتتىق بانك قىزمەتكەرلەرى مەسسەندجەر ارقىلى اۋديو جانە بەينەقوڭىراۋ شالمايدى.
"ءۇشىنشى تۇلعالار تاراپىنان ورىندالاتىن الاياقتىق ارەكەتتەرگە جول بەرمەس ءۇشىن ۇلتتىق بانك "مەملەكەتتىك ورگان قىزمەتكەرى، ۇلتتىق بانك قىزمەتكەرى" بولىپ قوڭىراۋ شالعان اداممەن اراداعى بايلانىستى ءۇزىپ، قانداي دا ءبىر تالقىدان نەمەسە تولەم وپەراسيالارىن جۇرگىزۋدەن باس تارتۋعا شاقىرادى. ۇلتتىق بانك جەكە تۇلعالاردىڭ شوتىنا قىزمەت كورسەتپەيدى، ازاماتتاردىڭ قارجى قۇرالدارىن ساقتاندىرۋمەن اينالىسپايدى، سونداي-اق حالىقپەن اقشالاي ەسەپ ايىرىسۋ وپەراسيالارىن جۇرگىزبەيدى. ەگەر ءسىز نەمەسە جاقىنىڭىز الاياقتاردىڭ ارباۋىنا تاپ بولسا، ارىز جازۋ ارقىلى قازاقستان رەسپۋبليكاسىنىڭ قۇقىق قورعاۋ ورگاندارىنا جۇگىنۋگە كەڭەس بەرەمىز. كەڭەس الۋ ءۇشىن 1477 قىسقا ءنومىرى بويىنشا قازاقستان ۇلتتىق بانكىنىڭ بايلانىس ورتالىعىنا دا حابارلاسۋعا بولادى"، - دەلىنگەن حابارلامادا.