قازاقستان ۇلتتىق بانكى زەرتتەۋ جۇرگىزۋشىلەرگە گرانت ۇسىنۋ ءۇشىن بايقاۋ جاريالادى، دەپ حابارلايدى aqshamnews.kz.
ۇلتتىق بانك زەرتتەۋ جۇرگىزۋشىلەرگە گرانت ۇسىنۋ ءۇشىن ىزدەنۋشىلەر اراسىندا كونكۋرستىق ىرىكتەۋ وتەتىنىن مالىمدەدى. ىزدەنۋشىلەر اراسىنداعى كونكۋرستىق ىرىكتەۋ تاقىرىبى: «مونەتا-اقشا اينالىمىن ىنتالاندىرۋ. ءتيىمدى تاجىريبەلەر مەن تابىستى ستراتەگيالار».
كونكۋرستىق ىرىكتەۋگە:
- جوعارى جانە جوعارى وقۋ ورنىنان كەيىنگى ءبىلىم بەرۋ باعدارلامالارىن ىسكە اسىرۋعا، زەرتتەۋ ىسىنە، عىلىمي قىزمەتكە نەمەسە ساۋالنامالار جۇرگىزۋ، دەرەكتەردى ينتەگراسيالاۋ ارقىلى دەرەكتەر جيناۋ، ساقتاۋ جانە (نەمەسە) وڭدەۋ قىزمەتىنە بايلانىستى ماقساتقا، مىندەتتەر مەن فۋنكسيالارعا سايكەس قىزمەتتى جۇزەگە اسىراتىن؛
- بانكروتقا ۇشىراماعان نەمەسە تاراتىلۋ پروسەسىندە تۇرماعان زاڭدى تۇلعالار قاتىسا الادى.
قازاقستان ۇلتتىق بانكى وتىنىمدەردى قاراپ بولعان سوڭ زەرتتەۋ تاقىرىبىنا ساي بىرنەشە گرانت بەرۋگە نەمەسە مۇلدەم بولمەۋگە قۇقىلى. كونكۋرستىق قۇجاتتامادا حابارلاندىرۋدىڭ تولىق ءماتىنى، ونىڭ ىشىندە زەرتتەۋ تاقىرىبى، زەرتتەۋ جۇمىستارىنا قويىلاتىن تالاپتار، ىزدەنۋشىلەردى ىرىكتەۋ شارتتارى، ۇلتتىق بانكتەگى جاۋاپتى تۇلعالاردىڭ بايلانىس دەرەكتەرى بەرىلگەن.
ءوتىنىم قابىلداۋ باستالاتىن كۇن – 2024 جىلعى 27 قاراشا. ءوتىنىم ۇسىنۋدىڭ سوڭعى مەرزىمى – 2025 جىلعى 10 قاڭتار.