مەملەكەت باسشىسىنىڭ جولداۋىنا قولداۋ پىكىر ءبىلدىرىپ جاتقاندار بار. سول پىكىرلەردىڭ ءبىرىن Almaty-akshamy.kz Egemen.kz-كە سىلتەمە جاساپ ۇسىنىپ وتىر.
«ءبىزدىڭ بۇگىنگى باستامالارىمىز قازاقستاننىڭ بولاشاعىن ايقىندايدى. ءبىز كۇن سايىن ەسكى مەن جاڭانىڭ، توقىراۋ مەن دامۋدىڭ اراسىنان تاڭداۋ جاسايمىز. بارشاڭىزدى ۇلت مۇددەسى ءۇشىن ۇيىسۋعا شاقىرامىن». پرەزيدەنت قاسىم-جومارت توقايەۆتىڭ جولداۋدا ايتقان بۇل سوزدەرى ادىلەتتى مەملەكەت، ءبىرتۇتاس ۇلت ءۇشىن ۇيىسۋ، بىرىگۋدى بىلدىرسە كەرەك.
پرەزيدەنت بولاشاققا باعىتتالعان بايىپتى باعدارلار مەن مىندەتتەردى سارالاۋ بارىسىندا دەنساۋلىق ساقتاۋ سالاسىنا دا ايرىقشا نازار اۋدارۋ قاجەتتىگىن باسا ايتتى. ەلىمىزدىڭ باستى قۇندىلىعى – ادام. بۇل – ايقىن نارسە. سوندىقتان ۇلتتىق بايلىقتى تەڭ ءبولۋ جانە بارشاعا بىردەي مۇمكىندىك بەرۋ – رەفورمانىڭ باستى ماقساتى.
ۇلت ساۋلىعى جاقسى بولسا عانا، قوعام ورنىقتى داميدى. دەنساۋلىق ساقتاۋ سالاسىندا ءبىراز رەفورما جۇرگىزىلدى. دەگەنمەن ونىڭ جاعدايى ءالى دە ءماز ەمەس. ارينە، جىلدار بويى قوردالانعان تۇيتكىلدەر ءبىر مەزەتتە شەشىلمەيدى. سوندىقتان اسا ماڭىزدى ماسەلەلەردى رەتكە كەلتىرۋگە باسا ءمان بەرگەن ءجون. سونىڭ ءبىرى – قارجىلاندىرۋ جۇيەسى. وسى سالاعا قارجىنىڭ جەتكىلىكتى ءبولىنبەۋى قالىپتى جاعدايعا اينالعان. سونىڭ كەسىرىنەن جۇرت ساقتاندىرۋ جۇيەسىنە قوسىلسا دا، مەديسينالىق قىزمەت تولىق كولەمدە كورسەتىلمەي وتىر.
«بۇگىندە مەديسينالىق كومەك مەملەكەت كەپىلدىك بەرگەن جانە ساقتاندىرۋ پاكەتى دەپ ەكىگە بولىنگەن. اشىعىن ايتساق، مۇنداي جۇيەنىڭ تيىمدىلىگى تومەن»، دەي كەلە مەملەكەت باسشىسى مەديسينالىق الەۋمەتتىك ساقتاندىرۋ جۇيەسىنە وزگەرىستەر ەنگىزۋ قاجەتتىگىن تاپسىردى. بۇگىندە مەديسينالىق الەۋمەتتىك ساقتاندىرىلماعان ادامدار سانى ءالى دە جەتىپ ارتىلادى. وسىنىڭ قيىندىعى ەمدەۋ مەكەمەلەرىنە كەدەرگى بولىپ وتىرعانى جاسىرىن ەمەس. حالىق اراسىندا بارىنشا اقپاراتتىق-ناسيحات جۇمىستار جۇرگىزىلىپ، ءتۇسىندىرىلىپ جاتقانىمەن، قيىندىقتار ءالى دە بار. الداعى ۋاقىتتا وسىنىڭ ءبارى رەتتەءلىپ ءبىر جۇيەگە كەلسە، سالا قىزمەتكەرلەرىنىڭ جۇمىسى دا العا ءجۇرىپ، حالىق دەنساۋلىعىن ارتتىرۋ باعىتىنداعى ىسىمىزگە جاڭاشا سەرپىن بەرەر ەدى. جالپى، دەنساۋلىق ساقتاۋ سالاسىن جانە جالپى الەۋمەتتىك سالانى قارجىلاندىرۋ جۇيەسى قايتا قارالاتىن بولعانى – قۋانتارلىق جاعداي.
جامبىل وبلىسىندا الداعى ۋاقىتتا بىرنەشە اۋدان تۇرعىندارىنا قىزمەت كورسەتۋ ءۇشىن جۇمىس ىستەپ تۇرعان اۋداندىق اۋرۋحانا بازاسىندا كوپبەيىنءدى اۋدانارالىق اۋرۋحانالار قۇرىلادى. قۇرامىندا ينسۋلت ورتالىقتارى جانە تەرى ارقىلى كرونالىق ارالاسۋ ورتالىقتارى، پەريناتالدىق ورتالىقتار نەمەسە بوساندىرۋ بولىمشەلەرى، تراۆماتولوگيا، حيرۋرگيا جانە مەديسينالىق وڭالتۋ بولىمشەلەرى بار كوپبەيىندى اۋدانارالىق اۋرۋحانالاردى ءوڭىردىڭ مەركى، تالاس جانە شۋ قالالىق ەمدەۋ مەكەمەسى بازاسىندا ىسكە قوسۋ جوسپارلانىپ وتىر. بۇگىنگى تاڭدا بەكىتىلگەن حالىق سانى، اۋىلداردىڭ اۋرۋحانامەن اراقاشىقتىعى ەسەپتەلىپ، قاجەتتى شتاتتىق قۇرامى جانە بەيىنءدى بولىمدەردىڭ توسەك-ورنىنا قاجەتتىلىكتەر انىقتالۋدا. قاجەتتى مەديسينالىق قۇرال-جابدىقتاردى جاڭارتۋ سەكىلدى وزەكتى ماسەلەلەر بويىنشا جۇمىستار قولعا الىندى.
سونىمەن قاتار «اۋىلدىق دەنساۋلىق ساقتاۋدى جاڭعىرتۋ» قاناتقاقتى جوباسىن ىسكە اسىرۋ ءۇشىن وبلىستا 46 جاڭا نىسان سالۋعا ناقتى قاجەتتىلىك ايقىندالدى. جولداۋدا پرەزيدەنت تەلەمەديسينا باعىتىن دامىتۋعا باسىمدىق بەرىپ، سول ارقىلى شالعايدا تۇراتىن حالىققا ساپالى مەديسينالىق قىزمەت كورسەتۋ جونىندە ايتتى.
قازىرگى تاڭدا تەلەمەديسينا ورتالىعى وبلىستىڭ بارلىق ەمدەۋ مەكەمەلەرى ۇيىمدارىمەن، سونداي-اق استانا، الماتى قالاسىنىڭ عىلىمي-زەرتتەۋ ينستيتۋتىمەن تاۋلىك بويى بايلانىستا. ورتالىق ارقىلى تەلەسەانستار وتكىزۋ وڭ جولعا قويىلعان. وبلىس بويىنشا جىل باسىنان بەرى مىڭعا جۋىق تەلەمەديسينالىق كەڭەس جاسالدى، ونىڭ ىشىندە تەلەفون ارقىلى – 107، تەلەمەديسينالىق كەڭەس سانى – 817. سونداي-اق 324 ناۋقاس تاسىمالداۋ ارقىلى ەم السا، 82 ناۋقاسقا وتا جاسالدى.
ال تۇرعىندارعا مەديسينالىق كومەك قولجەتىمدىلىگى ماسەلەسىنە كەلسەك، ەلدى مەكەندەردە بارلىعى 239 269 ادامدى مەديسينالىق تەكسەرۋمەن قامتۋ جوسپارلانعان بولسا، جىل باسىنان بەرى مەديسينالىق تەكسەرۋدەن 175 مىڭعا جۋىق ادام وتكەن. ونىڭ 50 مىڭى – بالالار.
«مەن كەلەسى جىلدان باستاپ اۋىل تۇرعىندارىنىڭ مۇقتاجدىقتارىنا باعىتتالعان ۇلتتىق جوبانى جۇزەگە اسىرۋ جونىندە شەشىم قابىلدادىم. ەكى جىل ىشىندە قازىرگى كەزدە مەديسينالىق مەكەمەسى جوق 650 اۋىلدا مەديسينالىق جانە فەلدشەرلىك-اكۋشەرلىك پۋنكتتەر سالىنىپ، تولىقتاي جابدىقتالادى. وسىلايشا، مەملەكەت ميلليوننان اسا ازاماتىمىزدى العاشقى مەديسينالىق-سانيتارلىق كومەكپەن قامتاماسىز ەتەدى.
ۇلتتىق جوبا اياسىندا 32 اۋداندىق اۋرۋحانا جاڭعىرتىلىپ، اۋدانارالىق كوپبەيىندى مەديسينالىق مەكەمە رەتىندە قايتا قۇرىلادى. وندا ينسۋلت ورتالىعى، حيرۋرگيا، جانساقتاۋ جانە وڭالتۋ بولىمدەرى پايدا بولادى»، دەپ مالىمدەدى مەملەكەت باسشىسى قاسىم-جومارت توقايەۆ.
وبلىسىمىزدا بيىل 23 نىساننىڭ قۇرىلىسى باستالدى، ونىڭ 22ء-سى اۋىلدىق جەرلەردە. مەركى، جامبىل اۋداندارىنداعى ورتالىقتار، سونداي-اق تالاس اۋدانىندا 9 مەديسينالىق مەكەمە كۇردەلى جوندەۋدەن ءوتتى. جامبىل وبلىسىندا الداعى 3 جىلدا اۋىلدىق جەرلەردە تاعى 46 دەنساۋلىق ساقتاۋ نىسانىن سالۋ جوسپارلانىپ وتىر. 2023 جىلى تالاس، مەركى، شۋ اۋداندارىندا اۋدانارالىق اۋرۋحانالار اشۋ ءۇشىن جوبالىق-سمەتالىق قۇجاتتار ازىرلەنۋدە.
حالىق ءۇشىن جاسالىنىپ جاتقان ءاربىر يگى ءىس، ءاربىر جاڭا باستاما تاۋەلسىز ەلىمىزدىڭ جاڭاشا باعىتتا دامىپ جاتقانىنىڭ ايقىن كورىنىسى. ءبىز، مەديسينا قىزمەتكەرلەرى، جولداۋ اياسىندا اتقارىلاتىن جۇمىستاردى قارقىندى تۇردە دامىتۋعا، ۇلت ساۋلىعىن ارتتىرۋعا بار كۇش-جىگەرىمىزدى سالامىز.