ۇلكەن الماتى كولىنە اپاراتىن جولعا كۇردەلى جوندەۋ جۇرگىزىلەدى

بۇل جوبانى 24 ايدا جۇزەگە اسىرۋ جوسپارلانىپ وتىر

ۇلكەن الماتى كولىنە اپاراتىن جولعا كۇردەلى جوندەۋ جۇرگىزىلەدى. «قازاۆتوجول» ۇك» اق قۇرىلىس ماۋسىمىنا اۋقىمدى دايىندىق جۇمىستارىن باستاپ كەتتى، دەپ حابارلايدى Almaty-akshamy.kz.

اكسيونەرلىك قوعامنىڭ باسپا ءسوز قىزمەتىنىڭ مالىمەتىنشە، ماسەلەن، رەسپۋبليكالىق ماڭىزى بار الماتى – كوسموستانسيا تراسساسىنىڭ 8-34 شاقىرىمى ارالىعىنداعى بولىك (الما-اراسان شيپاجايىنا كىرەبەرىس) كۇردەلى جوندەۋدەن وتەدى.

«قوعامدىق تىڭداۋ ءوتتى. بەلسەندىلەر داۋىس بەرىپ، ۇلكەن الماتى كولىنە اپارار جولدى كۇردەلى جوندەۋگە قارسى ەمەس ەكەندىكتەرىن جەتكىزدى. بۇگىندە جوبالاۋ-سمەتالىق قۇجاتتارى دايىن، ەكولوگيالىق ساراپتاما ساتىسىندا تۇر. ساراپتامانىڭ وڭ قورىتىندىسىن العاننان كەيىن كونكۋرس جاريالانىپ، زاڭناماعا سايكەس مەردىگەر انىقتالادى. سودان كەيىن ۋچاسكەدە قۇرىلىس-مونتاج جۇمىستارى جۇرگىزىلەدى»،-دەلىنگەن حابارلامادا.

ايتا كەتۋ كەرەك، جول ەكى جولاقتى بولىپ قالا بەرمەك. سونىمەن قاتار، جوبادا 1-گە 10 وتەمدىك اعاش وتىرعىزۋ قاراستىرىلعان.
كۇردەلى جوندەۋ جۇمىستارى اياسىندا اۋماقتا باقىلاۋ الاڭدارى، اۆتوكولىكتەرگە ارنالعان تۇراقتار جانە تاستىڭ قۇلاۋىنان قورعايتىن تورلار سالىنباق.

جول ينفراقۇرىلىمىن قايتا قۇرۋ جۇمىستارى ءتۋريزمدى ودان ءارى دامىتۋعا وڭ اسەر ەتەدى جانە قوناقتار مەن جەرگىلىكتى تۇرعىندار ءۇشىن قولايلى جاعداي جاسايدى. ال توتەنشە جاعدايلار كەزىندە ارنايى تەحنيكا جەرگىلىكتى جەرگە ودان دا جىلدام جەتەدى.
بۇل جوبانى 24 ايدا جۇزەگە اسىرۋ جوسپارلانىپ وتىر.

ەستەرىڭىزگە سالا كەتەيىك، الماتى - كوسموستانسيا رەسپۋبليكالىق ماڭىزى بار جول III ساناتقا جاتادى، جابىنى - اسفالت-بەتون. ونىڭ ۇزىندىعى 26 شاقىرىم.