بۇل تۋرالى ءماجىلىس دەپۋتاتى اسحات ايماعامبەتوۆ جازدى.
قازاقستاندا ۇل بالالارعا دا وبىر تۋدىراتىن ۆيرۋسقا قارسى ۆاكسينانى سالۋ ۇسىنىلدى، دەپ حابارلايدى aqshamnews.kz
- وتكەن اپتادا ءبىز دەنساۋلىق ساقتاۋ مينيسترىنە اتا-انالار كەزدەسۋلەردە ءجيى كوتەرىپ جۇرگەن ماڭىزدى ساۋالدى جولدادىق. اتاپ ايتقاندا – ۇل بالالاردى ادام پاپيللوماسى ۆيرۋسىنا (ۆپچ) قارسى ەكپەنىڭ ەرىكتى ۆاكسيناسيالاۋ باعدارلاماسىنا قوسۋ تۋرالى. ءقازىر قازاقستاندا قىز بالالار ادام پاپيللوماسى ۆيرۋسىنا قارسى ەكپەنى تەگىن الا الادى. بۇل – مىڭداعان ادامنىڭ ءومىرىن ساقتاپ قالاتىن وتە ماڭىزدى شەشىم جانە ۇلكەن جەتىستىك. ەندى وسى تاجىريبەنى كەڭەيتۋ ۇسىنىلىپ وتىر، دەيدى دەپۋتات.
ايماعامبەتوۆتىڭ سوزىنشە، ادام پاپيللوماسى ۆيرۋسى – تەك «ايەلدەرگە ءتان ۆيرۋس» ەمەس. بۇل ۆيرۋس جاتىر موينى قاتەرلى ىسىگىنەن بولەك، ەر ادامداردا كومەي، اۋىز قۋىسى مەن تىك ىشەك قاتەرلى ىسىكتەرىنىڭ دە دامۋىنا سەبەپ بولۋى مۇمكىن.
- بۇگىندە ۇل بالالارعا دا قىزدارمەن بىردەي ادام پاپيللوماسى ۆيرۋسىنا قارسى ۆاكسينا ەگىلەتىن كوپتەگەن ەل بار. سول سەبەپتى ءبىز بۇل ۆاكسينانى ەرىكتى نەگىزدە ۇلدارعا دا قولجەتىمدى ەتۋدى ۇسىندىق، دەيدى ايماعامبەتوۆ.
دەپۋتاتتىڭ سوزىنشە، ءقازىر بۇل ۆاكسينانى ءدارىحانالاردان تابۋ قيىن.
- سوندىقتان مەملەكەت تاراپىنان ونى بارلىق تىلەك بىلدىرۋشىگە قولجەتىمدى ەتۋ – اسا ماڭىزدى. ءبىز دەنساۋلىق ساقتاۋ مينيسترلىگى بۇل باستامانى قولدايدى دەپ ۇمىتتەنەمىز. سەبەبى ۇل بالالار دا ءقاۋىپ توبىنا جاتادى. ولاردىڭ دەنساۋلىعى نازاردان تىس قالماۋى كەرەك، دەيدى دەپۋتات.