قازاقستان رەسپۋبليكاسى ۇلتتىق ۇلانىنىڭ الماتى قالاسىندا ورنالاسقان 5571 اسكەري ءبولىمىنىڭ جاۋىنگەرلەرى قونايەۆ قالاسىنىڭ جاعاجايىندا پىشاق الىپ جۇرگەن ەر ادامدى قۇرىقتادى.
وقيعا 27 تامىزدا كەشكى ساعات 18.10 شاماسىندا بولعان. قىزمەتتە جۇرگەن اسكەري جاساققا جاس جىگىت كەلىپ «مايامي» دەمالىس ورنىنىڭ اۋماعىندا قولىندا پىشاعى بار ەر ادام تۇرعىندارعا بالاعات سوزدەر ايتىپ جۇرگەنى تۋرالى حابارلاعان.
وقيعا ورنىنا كەلگەن اسكەري جاساق باستىعى قاتارداعى نۇرايدار باتىرباي، ءپاترۋلشى جاۋىنگەرلەر قاتارداعى نۇرلىباي ءابجاپپار مەن دوسىمجان قۇرالبەك قوعامدىق ءتارتىپتى بۇزىپ، ءوزىن اگرەسيۆتى ۇستاعان ازاماتتى بايقايدى. ول سول ماڭداعى ادامدارعا قوقان-لوقى كورسەتىپ، ءتىل تيگىزگەن. قورعانىستىڭ ءتۇرلى ادىس-تاسىلدەرىن مەڭگەرگەن جاساق شاپشاڭ ارەكەت ەتىپ، بۇزاقىنىڭ قولىنداعى پىشاعىن قاعىپ جىبەرگەن، ىلە قولىن ارتقا قايىرىپ، كۇدىكتىنى تىرپ ەتكىزبەدى. ال قولىنداعى اس ءۇي پىشاعى تاركىلەندى.
“ءبىز ءوزىن اگرەسسيۆتى ۇستاپ، ادامدارعا بالاعات ءسوز ايتىپ جۇرگەن ەر ازاماتتى بايقادىق تا، سوعان قاراي باردىق. ول قولىنداعى پىشاعىن جالاڭداتىپ، جان-جاعىنا سىلتەي باستادى. وزىنە ەشكىمنىڭ جاقىنداماۋىن تالاپ ەتىپ، بالاعات سوزدەر ايتىپ ايقايلادى. ءبىز دەرەۋ ول ازاماتتى قولعا ءتۇسىرۋ ءۇشىن ارەكەت جاسادىق، سەبەبى ول اينالاسىنا ءقاۋىپ ءتوندىردى. جەكپە-جەك ۇرىسىنىڭ تاسىلدەرىن پايدالانىپ اقىرى ءبىز ونى ۇستادىق”، - دەيدى قاتارداعى نۇرايدار باتىرباي.
ۇلتتىق ۇلان ساربازدارى 1985 جىلى تۋعان ادامدى ودان ءارى تەكسەرۋ ءۇشىن قونايەۆ قالاسى ءىىب پوليسيا قىزمەتكەرلەرىنە تابىستادى.