ۇكىمەتتەگىلەر ەندى تويعا بارماۋى مۇمكىن

ماقسات – ىسىراپشىلدىققا جول بەرمەۋ.

قىرعىزستاندا ەندى ۇكىمەت مۇشەلەرىنىڭ تويعا بارۋىنا تىيىم سالىنۋى مۇمكىن، دەپ حابارلايدى Almaty-akshamy.kz 24.kg باسىلىمىنا سىلتەمە جاساپ.

قىرعىزستان پرەزيدەنتى اكىمشىلىگىنىڭ القا ماجىلىسىندە مينيسترلەر كابينەتىنىڭ باسشىسى اقىلبەك جاپاروۆ ۇكىمەت مۇشەلەرىنە تويعا بارۋعا تىيىم سالدى.

ونىڭ ايتۋىنشا، مەملەكەت باسشىسىنىڭ بارلىق جارلىعى مەن تاپسىرماسى ساپالى ءارى ۋاقىتىلى ورىندالۋى ءتيىس. مينيسترلەر كابينەتىنىڭ باسشىسى سادىر جاپاروۆتىڭ توي وتكىزۋ كەزىندە مال سويۋعا جانە ىسىراپشىلدىققا تىيىم سالۋ تۋرالى قاۋلىسىنا جەكە توقتالدى.

"ەگەر ءسىز ءبىر جەردە ىسىراپ جاسالعانىن كورسەڭىزدەر، ول جەرگە بارماڭىز. تويدا جۇرمەڭىزدەر"، دەدى ا.جاپاروۆ.

2022 جىلدىڭ اقپانىندا قىرعىزستاندا ءىس-شارالار وتكىزۋ كەزىندەگى شەكتەۋلەر تۋرالى پرەزيدەنت جارلىعىنا قول قويىلدى.

ونىڭ ماقساتى – ازاماتتاردىڭ الەۋمەتتىك-ەكونوميكالىق ءومىر ءسۇرۋ دەڭگەيىن ارتتىرۋ، سونداي-اق قوعامداعى رۋحاني اتموسفەراعا تەرىس اسەر ەتەتىن ءدىني جورالار، راسىمدەر، باسقا دا ءىس-شارالاردى وتكىزۋ كەزىندە ىسىراپشىلدىققا جول بەرمەۋ.