تۇرعىندار ايلاپ سۋسىز قالۋدا
سەنبى، 20 مامىر كۇنى، پرەمەر-مينيستر ءاليحان سمايىلوۆ ۇيلەستىرۋ شتابىنىڭ وتىرىسىن وتكىزدى. وندا ەلدى مەكەندەردى سۋمەن قامتاماسىز ەتۋ شارالارى قارالدى، دەپ حابارلايدى Almaty-akshamy.kz primeminister.kz سايتىنا سىلتەمە جاساپ.
يندۋستريا جانە ينفراقۇرىلىمدىق دامۋ ءمينيسترى مارات قارابايەۆ مەملەكەت باسشىسىنىڭ تاپسىرماسىنا سايكەس 2025 جىلدىڭ سوڭىنا دەيىن حالىقتى ساپالى اۋىز سۋمەن 100% قامتاماسىز ەتۋ جوسپارلانىپ وتىرعانىن باياندادى.
بۇگىنگى تاڭدا اۋىز سۋعا قولجەتىمدىلىك قالالاردا – 98،4%، اۋىلداردا – 94،5% قۇراپ وتىر.ەڭ از قامتۋ اباي، اقمولا جانە جامبىل وبلىستارىنىڭ قالالارىندا، سونداي-اق اقمولا، قوستاناي جانە سولتۇستىك قازاقستان وبلىستارىنىڭ اۋىلدارىندا تىركەلگەن.
بيىل سۋمەن جابدىقتاۋ، سۋ بۇرۋ جۇيەلەرىن سالۋ جانە رەكونسترۋكسيالاۋعا رەسپۋبليكالىق بيۋدجەتتەن 402 جوبانى ىسكە اسىرۋعا 280 ملرد تەڭگە ءبولىندى. جالپى، 2025 جىلعا دەيىن قالعان 25 قالا مەن 1 395 اۋىلدىڭ حالقىن تازا اۋىز سۋمەن قامتاماسىز ەتۋ قاجەت. وسىعان بايلانىستى رەسپۋبليكانىڭ ءاربىر ەلدى مەكەنىن قامتيتىن ءتيىستى جوسپار ازىرلەندى. ونىڭ ىشىندە ىزدەستىرۋ-بارلاۋ جۇمىستارىن جۇرگىزۋ، جوبالاۋ-سمەتالىق قۇجاتتامانى ازىرلەۋ جانە قۇرىلىس-مونتاجداۋ جۇمىستارىنىڭ بارىسىنا مونيتورينگ جۇرگىزىلەدى.
توپتىق سۋ قۇبىرلارىن سالۋ جانە رەكونسترۋكسيا جۇمىستارىنىڭ بارىسى تۋرالى ەكولوگيا ۆيسە-مينيسترى نۇركەن شاربييەۆ باياندادى. قوستاناي وبلىسىنىڭ اكىمى قۇمار اقساقالوۆ، تۇركىستان وبلىسىنىڭ اكىمى دارحان ساتىبالدى، باتىس قازاقستان وبلىسىنىڭ اكىمى ناريمان تورەعالييەۆ وڭىرلەردە اتقارىلىپ جاتقان شارالارعا توقتالدى.
پرەمەر-مينيستر مامىر ايىنىڭ باسىندا ۇكىمەت وتىرىسىندا اۋىز سۋ جوبالارى بويىنشا «اياقتالماعان قۇرىلىستار» تۋرالى ايتىلعانىن ەسكە سالدى. ولاردى اياقتايمىز دەگەنشە، قولدانىستاعى ينفراقۇرىلىمدار جارامسىز بولىپ قالۋدا.
«اقتوبە قالاسىنداعى قارعالى شاعىن اۋدانىنىڭ تۇرعىندارى سۋىق سۋ مەن ىستىق سۋدىڭ ءجيى توقتاپ قالاتىنىنا شاعىم ايتۋدا. اقمولا وبلىسىنىڭ ەگىندىكول اۋدانىندا ابدەن توزىعى جەتكەن نۇرا سۋ وتكىزگىشى جالعىز ءوزى 12 اۋىلدى سۋمەن قامتاماسىز ەتىپ وتىر. ونداعى سۋدىڭ شىعىنى 70-80% جەتەدى. بۇل اۋىلداردىڭ تۇرعىندارى قۇبىرلاردىڭ ءجيى جارىلۋىنان ايلار بويى سۋسىز قالادى»، — دەدى ءاليحان سمايىلوۆ.
ول سونداي-اق الماتى وبلىسىنداعى تالعار اۋدانىنىڭ كىشى بايسەركە اۋىلىندا سۋ قۇبىرى تولىق قۋاتىندا جۇمىس ىستەمەيتىنىن ايتتى.
«بۇلار بيىل حالىقتان رەسمي تۇردە كەلىپ تۇسكەن 9 مىڭ شاعىمنىڭ بىرنەشە مىسالى عانا»، — دەپ اتاپ ءوتتى پرەمەر-مينيستر.