سىرداريا وزەنى باسسەينىندە سۋ تايازدىعى تالقىلاندى
ق ر پرەمەر-مينيسترى ءاليحان سمايىلوۆ سۋ كەڭەسىنىڭ وتىرىسىن وتكىزدى، دەپ حابارلايدى Almaty-akshamy.kz Inform.kz-كە سىلتەمە جاساپ.
وندا ءبىر مەملەكەتتىك ورگانعا سۋمەن جابدىقتاۋ جانە سۋمەن قامتاماسىز ەتۋ فۋنكسيالارىن بىرىكتىرۋ ماسەلەلەرى، سونداي-اق سىرداريا وزەنى باسسەينىندەگى سۋ شارۋاشىلىعى جاعدايى قارالدى. ءبىرىنشى ماسەلە بويىنشا بايانداما جاساعان ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ قازىرگى تاڭدا مەملەكەتتىك سۋ ساياساتىن ىسكە اسىرۋ ءتۇرلى مەملەكەتتىك ورگانداردىڭ قۇزىرىندا ەكەنىن اتاپ ءوتتى.
وسىلايشا، ازاماتتاردى جانە ەكونوميكا سالالارىن سۋمەن قامتاماسىز ەتۋگە، سونداي-اق سۋ رەسۋرستارىن پايدالانۋ مەن قورعاۋعا قاتىستى فۋنكسيالار ءۇش مينيسترلىككە — ەكولوگيا، گەولوگيا جانە تابيعي رەسۋرستار، اۋىل شارۋاشىلىعى، يندۋستريا جانە ينفراقۇرىلىمدىق دامۋ مينيسترلىكتەرىنە جۇكتەلگەن. مەملەكەت باسشىسىنىڭ تاپسىرماسىن ورىنداۋ اياسىندا ەكولوگيا، گەولوگيا جانە تابيعي رەسۋرستار مينيسترلىگىنە سۋ رەسۋرستارىن باسقارۋعا، سۋ بۇرۋعا، ازاماتتار مەن ەكونوميكا سالالارىن سۋمەن قامتاماسىز ەتۋگە، سونداي-اق سۋ ەكوجۇيەلەرىن قولداۋعا بايلانىستى نەگىزگى فۋنكسيالاردى قوسۋ ۇسىنىلادى.
ق ر پرەمەر-مينيسترى ۇسىنىلعان تاسىلدەرگە قاتىستى ءبىرقاتار ەسكەرتۋ جاساپ، ۆەدومستۆوارالىق ۇيلەستىرۋدى كۇشەيتە وتىرىپ (جەكەلەگەن باعىتتار بويىنشا)، ولاردى قوسىمشا پىسىقتاۋدى تاپسىردى. كۇن تارتىبىندەگى ەكىنشى ماسەلەنى تالقىلاۋ بارىسىندا بيىل سىرداريا وزەنى باسسەينىندە سۋ تايازدىعى سيكلى جالعاسىپ جاتقانى ايتىلدى. بۇل ورايدا باسسەين ەلدەرى سۋ شارۋاشىلىعىنداعى كۇردەلى جاعدايدىڭ تەرىس سالدارىن بولدىرماۋ ءۇشىن كەلىسىپ ارەكەت ەتۋدە.
ماسەلەن، توقتوعۇل سۋ قويماسىندا سۋدىڭ جينالۋ جاعدايى تۇراقتاندى. قازاقستان مەن وزبەكستان «باحري توچيك» سۋ قويماسىنىڭ قارقىندى ۆەگەتاسيالىق كەزەڭدەگى جۇمىس رەجيمىن تاجىكستانمەن كەلىسىپ جاتىر. بۇل شارالار سىرداريا وزەنىنىڭ جوعارعى جانە ورتا اعىسىنداعى، سونداي-اق تۇركىستان وبلىسىنىڭ جەتىساي جانە ماقتاارال اۋداندارىنداعى فەرمەرلەردى «دوستىق» كانالى ارقىلى ماۋسىم-تامىز ايلارىندا شامامەن 550 ملن م3 كولەمىندە – وتكەن جىلعى دەڭگەيدە سۋارمالى سۋمەن قامتاماسىز ەتۋگە مۇمكىندىك بەرەدى. ءاليحان سمايىلوۆ اتالعان جۇمىستى باقىلاۋدا ۇستاپ، قازاقستاننىڭ مەملەكەتارالىق ىنتىماقتاستىق اياسىنداعى مىندەتتەمەلەرىن ورىنداۋ فورماتىن ناقتىلاۋدى تاپسىردى.