وزبەكستاننىڭ پرەمەر-مينيسترى قىزمەتتىك كولىگىن اۋىستىردى
وزبەكستان پرەمەر-مينيسترى ابدۋللا اريپوۆ ءوز قىزمەتىندە پايدالانعان شەتەلدىك Mercedes-Benz ماركالى كولىگىن وتاندىق "Malibu" تەمىر تۇلپارىنا اۋىستىردى. بۇل تۋرالى aqshamnews.kz حابارلايدى UZA اقپارات اگەنتتىگىنە سىلتەمە جاساپ.
پرەمەر-مينيستردىڭ ايتۋىنشا، ەل پرەزيدەنتى شاۆكات ميرزيويەۆتىڭ تاپسىرماسىنا سايكەس، بارلىق لاۋازىمدى تۇلعالار شەتەلدىك ماركاداعى كولىكتەردەن باس تارتۋعا مىندەتتەلگەن. ارينە، بۇل پروسەسس 20 ناۋرىزدان نەمەسە 1 ساۋىردەن باستالۋى جوسپارلانعانىمەن، تاپسىرما ۋاقىتىنان بۇرىن ورىندالۋى ءتيىس بولعاندىقتان، جۇمىستار ەرتە باستالدى. اريپوۆ بۇل وزگەرىستىڭ جەدەل ءارى ءتيىمدى تۇردە جۇزەگە اسىرىلۋى قاجەت ەكەنىن اتاپ ءوتتى.
وزبەكستاندا بارلىق مينيسترلىكتەر مەن ۆەدومستۆولار وتاندىق كولىكتەردى پايدالانۋ رەجيمىنە كوشكەن. مىسالى، پرەمەر-مينيستردىڭ ورىنباسارلارى "Malibu" ماركالى كولىكتەرگە وتىراتىن بولسا، وبلىس حوكيمدەرى "Tahoe" جانە "Traverse" جول تالعامايتىن كولىكتەرىن قولدانۋدا. شەنەۋنىكتەرگە جاڭادان ساتىپ الىنعان ەمەس، بۇرىننان قولدانىلىپ كەلگەن كولىكتەر بەرىلەدى.
سونىمەن قاتار، بۇرىنعى شەتەلدىك كولىكتەر اۋكسيون ارقىلى ساتىلىمعا شىعارىلادى.
وزبەكستان پرەزيدەنتى شاۆكات ميرزيويەۆ وسىعان دەيىن سىبايلاس جەمقورلىققا قارسى كۇرەس جونىندەگى ۇلتتىق كەڭەستە سويلەگەن سوزىندە شەتەلدىك قىزمەتتىك كولىكتەردى قىسقارتۋدى جانە وتاندىق كولىك ءوندىرىسىن قولداۋدى تاپسىرعان بولاتىن.