ۇكىمەت قاۋلىسىمەن قوجا احمەت ياسساۋي كەسەنەسى مەملەكەتتىك قورعاۋعا الىندى

 «ازىرەت سۇلتان» مۇراجاي-قورىعى ەندى مەملەكەتتىك قورعاۋدا بولادى. ق ر پرەمەر-مينيسترى ولجاس بەكتەنوۆ ءتيىستى قاۋلىعا قول قويدى، دەپ حابارلايدى aqshamnews.kz.

بەلگىلى تاريحي ەسكەرتكىش – قوجا احمەت ياسساۋي كەسەنەسى يۋنەسكو-نىڭ بۇكىلالەمدىك مۇرا تىزىمىنە ەنگىزىلگەن العاشقى قازاقستاندىق نىسان جانە ورتاعاسىرلىق ساۋلەت ونەرىنىڭ بىرەگەي ەسكەرتكىشتەرىنە جاتادى.

ونىڭ ماڭىزدىلىعى مەن تاريحي-مادەني قۇندىلىعىن ەسكەرە وتىرىپ، سونداي-اق ونىڭ ساقتالۋىن قامتاماسىز ەتۋ ماقساتىندا ۇكىمەت «ازىرەت سۇلتان» مۇراجاي-قورىعىن مەملەكەتتىك قورعاۋعا جاتاتىن وبەكتىلەر تىزبەسىنە ەنگىزۋ تۋرالى شەشىم قابىلدادى.

نىساننىڭ قاۋىپسىزدىگىن ىشكى ىستەر ورگاندارىنىڭ ءتيىستى بولىمشەلەرى قامتاماسىز ەتەدى.

كەسەنە تۇركىستان قالاسىندا تۇركى اقىنى جانە سوپىلىق ءىلىمنىڭ نەگىزىن قالاۋشى قوجا احمەت ياسساۋي جەرلەنگەن ورىندا تۇرعىزىلعان.

كەسەنە سەگىز بولمەدەن تۇرادى. ولار تايقازان تۇرعان ورتاداعى ەڭ ۇلكەن زالدى اينالا ورنالاسقان. 1385-1405 جىلدار ارالىعىندا كەسەنەنىڭ توڭىرەگىنە قوسالقى عيماراتتار سالىنعان. بۇگىندە مۇراجاي-قورىق اۋماعىنا مەشىت، ۇلكەن جانە كىشى اقساراي زالدارى، كىتاپحانا جانە شارۋاشىلىق كەشەنى: قۇدىق، اسحانا، تۇرعىنجايلار (حۇجرالار) جانە ت. ب كىرەدى.