مەملەكەت باسشىسىنىڭ جارلىعىمەن 2022 جىل بالالار جىلى بولىپ جاريالاندى.
بالالاردىڭ قاۋىپسىزدىگى مەن ولاردىڭ ءال-اۋقاتى بۇگىنگى ۇكىمەت وتىرىسىنىڭ باستى تاقىرىپتارىنىڭ ءبىرى بولدى، دەپ حابارلايدى Almaty-akshamy.kz.
«بۇگىن، 1 ماۋسىم، حالىقارالىق بالالاردى قورعاۋ كۇنى. بيىل بۇل مەرەكەنىڭ قازاقستاندىق بالالار مەن اتا-انالار ءۇشىن ەرەكشە ءمانى بار. ويتكەنى مەملەكەت باسشىسىنىڭ جارلىعىمەن 2022 جىل بالالار جىلى بولىپ جاريالاندى.
بارلىق كىشكەنتاي بالعىندارىمىزدى وسى شۋاقتى مەرەكەمەن قۇتتىقتايمىز!
بالالارعا قامقورلىق جاساۋ، ولاردىڭ قۇقىقتارىن قورعاۋ – مەملەكەتتىڭ اسا ماڭىزدى مىندەتتەرىنىڭ ءبىرى»، – دەپ اتاپ ءوتتى ءاليحان سمايىلوۆ.
ق ر پرەمەر-مينيسترى ءبىرقاتار ناقتى تاپسىرما بەردى وبلىس اكىمدىكتەرىنە الەۋمەتتىك جاعىنان از قامتىلعان ساناتتاعى بالالاردى ساۋىقتىرۋ شارالارىمەن، جازعى دەمالىسپەن جانە بوس ۋاقىتتارىن پايدالى وتكىزۋمەن بارىنشا قامتۋ تاپسىرىلدى.
بارلىق اۋىلدىق ەلدى مەكەندە سپورت الاڭدارىن، بالالاردى دامىتۋ ورتالىقتارىن جابدىقتاپ، ويىن-ساۋىق، مادەني ءىس-شارالار ۇيىمداستىرۋ قاجەت.
دەنساۋلىق ساقتاۋ مينيسترلىگى شالعايداعى ەلدى مەكەندەردە بالالاردىڭ دەنساۋلىق جاعدايىنا سكرينينگتىك جانە ستوماتولوگيالىق تەكسەرۋلەر جۇرگىزۋ ءۇشىن جىلجىمالى مەديسينالىق پۋنكتتەردىڭ جۇمىس ىستەۋىنە قاتىستى شارالار قابىلداسىن.
بالالار قۇقىقتارىنىڭ ساقتالۋىن قامتاماسىز ەتۋ ءۇشىن ءبىلىم جانە عىلىم مينيسترلىگى اكىمدىكتەرمەن بىرلەسىپ، ءوڭىر اكىمدىكتەرى جانىنداعى تاۋەلسىز بالا قۇقىقتارى جونىندەگى ۋاكىلدەردىڭ لاۋازىمدارىن ەنگىزۋدى تەزدەتسىن.
مادەنيەت مينيسترلىگى ىشكى ءتۋريزمدى دامىتۋ اياسىندا بالالار ءۇشىن ەكسكۋرسيالىق-تانىمدىق ءىس-شارالار ۇيىمداستىرسىن.
بالالاردى ۇيىرمەلەرمەن جانە سەكسيالارمەن قامتۋ ماقساتىندا ءبىلىم جانە عىلىم، مادەنيەت جانە سپورت مينيسترلىكتەرى، ءوڭىر اكىمدىكتەرى مەملەكەتتىك ءبىلىم بەرۋ، سپورت جانە شىعارماشىلىق تاپسىرىستار بويىنشا اقپاراتتىق جۇيەلەر ينتەگراسياسىن قامتاماسىز ەتسىن.