ۇكىمەت باسشىسى مەدەيسينا قىزمەتكەرلەرىن كاسىبي مەرەكەلەرىمەن قۇتتىقتادى

ۇلت دەنساۋلىعىن نىعايتۋ – مەملەكەتىمىزدىڭ ەڭ ماڭىزدى باسىمدىعى - ءاليحان سمايىلوۆ.

پرەمەر-مينيستر ءاليحان سمايىلوۆ مەديسينا قىزمەتكەرلەرىن كاسىبي مەرەكەلەرىمەن قۇتتىقتادى، دەپ حابارلايدى Almaty-akshamy.kz.

«سىزدەردى مەديسينا قىزمەتكەرى كۇنىمەن شىن جۇرەكتەن قۇتتىقتايمىن! ادام ءومىرىن ساقتاپ، دەنساۋلىعىن نىعايتۋ جولىندا اق حالاتتى ابزال جانداردىڭ ەڭبەگى ۇشان-تەڭىز.

ءاردايىم باقىتتى عۇمىر كەشىپ، قيىن دا اۋىر ەڭبەكتەرىڭىزدىڭ جەمىسىن كورىڭىزدەر.

ۇلت دەنساۋلىعىن نىعايتۋ – مەملەكەتىمىزدىڭ ەڭ ماڭىزدى باسىمدىعى.

قاجىر-قايراتتى تالاپ ەتەتىن وسىناۋ مارتەبەلى مىندەت اق حالاتتى ابزال جانداردىڭ يىعىندا ەكەنى ءسوزسىز.

قازاقستاندا مەديسينانىڭ ءبىرقاتار باعىتى ءقازىردىڭ وزىندە حالىقارالىق دەڭگەيدە تابىستى باسەكەلەستىككە تۇسۋدە. بۇگىندە حالىققا جوعارى تەحنولوگيالىق مەديسينا قىزمەتتەرى قولجەتىمدى. ۇلتتىق عىلىمي كارديوحيرۋرگيا، ۇلتتىق نەيروحيرۋرگيا، يادرولىق مەديسينا جانە باسقا دا كوپتەگەن زاماناۋي مەديسينا ورتالىقتارى جۇمىس ىستەپ تۇر»، - دەپ جازدى ۇكىمەت باسشىسى.

ءا.سمايىلوۆ مەملەكەت باسشىسىنىڭ تاپسىرماسى اياسىندا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسىن جۇزەگە اسىرۋ باستالعانىن ەسكە سالدى. ونىڭ شەڭبەرىندە بيىل 309 العاشقى مەديسينالىق-سانيتارلىق كومەك كورسەتۋ نىسانى سالىنادى.

«مەملەكەت الداعى ۋاقىتتا دا قازاقستاندىق دارىگەرلەردىڭ ەڭبەگىن باعالاپ، ءال-اۋقاتىن جاقسارتۋ جولىندا بار كۇش-جىگەرىن سالادى.

ەرەن ەڭبەكتەرىڭىز ءۇشىن مىڭ العىس! سىزدەرگە مىقتى دەنساۋلىق، قاجىماس قايرات، بولاشاققا سەنىم، ابىروي جانە تابىس تىلەيمىن!»، - دەدى پرەمەر-مينيستر.