قاڭتار-تامىزدا ەلىمىزدە 73،7 ملن توننا كومىر وندىرىلگەن
ق ر پرەمەر-مينيسترى ءاليحان سمايىلوۆ ۇكىمەتتە وتكەن كەڭەستە حالىقتى كومىرمەن قامتاماسىز ەتۋ بويىنشا ءبىرقاتار تاپسىرما بەردى. بۇل تۋرالى Almaty-akshamy.kz ۇكىمەتتىڭ سايتىنا سىلتەمە جاساپ حابارلايدى.
2022 جىلعى قاڭتار-تامىزدا ەلىمىزدە 73،7 ملن توننا كومىر وندىرىلگەن، بۇل وتكەن جىلدىڭ سايكەس كەزەڭىمەن سالىستىرعاندا 6،2%-عا كوپ. كومىر ءوندىرۋشى كاسىپورىنداردىڭ دەرەكتەرى بويىنشا ونىڭ نەگىزگى رازرەزدەردەگى قۇنى وتكەن جىلعى دەڭگەيدە ساقتالعان. ال ساتۋ ورىندارىندا كومىر باعاسىنىڭ وسۋىنە جول بەرمەۋ ءۇشىن ونى ۇزدىكسىز تاسىمالداۋدى قامتاماسىز ەتۋ جانە اۆتوموبيل كولىگىمەن ەلدەن تىس جەرلەرگە اكەتۋدى شەكتەۋ (6 ايعا) جونىندە شارالار قابىلداندى.
سونىمەن قاتار ازاماتتارعا ىڭعايلى بولۋى ءۇشىن كومىردى تانىمال ماركەتپلەيستەر مەن بانك قوسىمشالارى ارقىلى وتكىزۋ جولدارى پىسىقتالىپ جاتىر. بۇل باعىتتا ەلىمىزدەگى ەڭ ءىرى بانكتەردىڭ ءبىرى قوستاناي وبلىسىندا پيلوتتىق جوبانى ىسكە قوستى. پرەمەر-مينيستر بۇل ءتاسىل كومىر ساتىلاتىن ورىنداردا كەزەكتەردى ازايتۋعا مۇمكىندىك بەرەتىنىن اتاپ ءوتتى.
«بۇل – تۇتىنۋشىلارعا قولايلى، وتە جاقسى سيفرلىق شەشىم. ۇيدەن شىقپاي-اق كومىرگە تاپسىرىس بەرۋگە بولادى. جەرگىلىكتى جەرلەردە ءتيىستى ءتۇسىندىرۋ جۇمىستارىن جۇرگىزۋ قاجەت»، — دەدى ءاليحان سمايىلوۆ.
ۇكىمەت باسشىسى كومىر جەتكىزۋ مەن ءبولۋدى ەرەكشە باقىلاۋدا ۇستاۋدى تاپسىردى.