بيۋدجەتتىڭ كىرىسى 16 ترلن تەڭگە دەڭگەيىندە قالىپتاسادى.
ق ر ۇلتتىق ەكونوميكا ۆيسە-مينيسترى ازامات ءامرين 2023 جىلعى بيۋدجەتتى قالىپتاستىرۋ كەزىندە ۇكىمەت مۇنايدىڭ ەسەپتىك باعاسى مەن دوللاردىڭ تەڭگەگە قاتىستى ەسەپتىك باعامىن قاي دەڭگەيدە بەلگىلەپ وتىرعانىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«كەلەر جىلداعى بيۋدجەت بولجامىندا مۇنايعا قاتىستى ەسەپتى باعا باررەلىنە 85 اقش دوللارىن قۇراپ وتىر. 1 دوللار ءۇشىن باعام 470 تەڭگە شاماسىندا بەلگىلەنگەن. وسى ەسەپتەۋلەر اياسىندا رەسپۋبليكالىق بيۋدجەتتىڭ كىرىسى 16 ترلن تەڭگە دەڭگەيىندە قالىپتاسادى»، - دەدى ا. ءامرين سەناتتا زاڭ جوباسىن تانىستىرعانان كەيىن وتكەن باسپا ءسوز ءماسليحاتىندا.
بۇدان بۇرىن حابارلانعانداي، بۇگىن پارلامەنت ءماجىلىسىنىڭ جالپى وتىرىسىندا «2023 - 2025 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسى ماقۇلداندى.
وسى ورايدا ق ر ۇلتتىق ەكونوميكا ءمينيسترى الىبەك قۋانتىروۆ 2023 - 2027 جىلدارعا ارنالعان الەۋمەتتىك-ەكونوميكالىق دامۋ بولجامى تۋرالى ايتىپ بەردى.
ءمينيستردىڭ سوزىنە قاراعاندا، بولجام مەن بيۋدجەتتىك پارامەترلەردى قالىپتاستىرۋدىڭ نەگىزى رەتىندە بازالىق سەناريي الىندى. وسى سەناريي بويىنشا مۇنايدىڭ ورتاشا باعاسى باررەلىنە 85$ دەپ كورسەتىلگەن. جالپى ىشكى ءونىمنىڭ ورتاشا جىلدىق ناقتى ءوسۋى 3،9% بولادى.