ۋيمبلدون چەمپيونى، قازاقستاننىڭ ءبىرىنشى، الەمنىڭ 23-راكەتكاسى ەلەنا رىباكينانىڭ سان-حوسە WTA-500 تۋرنيرىندەگى قارسىلاسى انىقتالدى، دەپ حابارلايدى Almaty-akshamy.kz Inform.kz-كە سىلتەمە جاساپ.
اقش-تا 1-7 تامىزدا حارد توسەنىشىندە وتەتىن جارىستىڭ العاشقى اينالىمىندا قازاقستاندىق تەننيسشى الەمنىڭ 12ء-ىنشى، وسى دودانىڭ 7-راكەتكاسى، رەسەيلىك داريا كاساتكينامەن شەبەرلىك بايقاسادى.
الەمنىڭ 3-راكەتكاسى، گرەكيالىق ماريا ساككاري ءتۋرنيردى ەكىنشى اينالىمنان باستاپ، امەريكالىق شەلبي رودجەرس نەمەسە كانادالىق بيانكا اندرەەسكۋدىڭ بىرەۋىمەن كەزدەسەدى. جارىستىڭ ەكىنشى راكەتكاسى بولىپ تىركەلگەن، دۇنيەجۇزىلىك رەيتينگتە ءتورتىنشى ساتىداعى يسپانيالىق پاۋلا بادوسا ەكىنشى راۋندتا امەريكالىق ەليسون ريسكە نەمەسە ىرىكتەۋ سايىسى جەڭىمپازدارىنىڭ بىرىمەن كورتقا شىعادى.
العاشقى اينالىمداعى قىزىقتى ماچتار دەپ مىنالاردى ايتۋعا بولادى:
اماندا انيسيموۆا (اقش) – ەشلين كريۋگەر (اقش، WC)؛
كارولينا پليشكوۆا (چەحيا، 8) – كەيتي بۋلتەر (ۇلىبريتانيا، WC)؛
كاميلا دجوردجي (يتاليا) – گاربينە مۋگۋرۋسا (يسپانيا، 5)؛
ناومي وساكا (جاپونيا) – چجەن سينۆەن (جۇڭگو).
دودانىڭ جۇلدە قورى 757 مىڭ اقش دوللارىنان اسادى.
وتكەن جىلى مۇندا امەريكالىق دانيەل كوللينز جەڭىمپاز اتانعان بولاتىن.