سيريادا جەر سىلكىنىسىنەن ءۇش اي وتكەن سوڭ ءۇيىندى استىنان ءتىرى ادام شىعارىلدى
سيرياداعى جەر سىلكىنىسىنەن ءۇش ايعا جۋىق ۋاقىتتان كەيىن قۇتقارۋشىلار ءۇيىندى استىنان ءتىرى قالعان ەر ادامدى الىپ شىقتى، دەپ حابارلايدى Almaty-akshamy.kz Azattyq Ruhy-نا سىلتەمە جاساپ.
Akhbar.fouri حابارلاۋىنشا، 16 مامىردا جەلىدە تاراتىلعان ۆيدەولاردان بەت-اۋزىن ساقال-مۇرت باسقان، قاتتى ازىپ، تەرىسى سۇيەگىنە جابىسىپ قالعان ەر ادامنىڭ قۇتقارىلعان ءساتىن كورۋگە بولادى.
ونىڭ مۇنشا ۋاقىت ىشىندە قالاي امان قالعانى بەلگىسىز. قۇتقارۋشىلار ەر ادامدى دارىگەرلەرگە تاپسىردى. ءقازىر اۋرۋحانادا ەمدەلىپ جاتىر.
ايتا كەتەيىك، سيريادا 6 اقپاندا كۇشتى جەر سىلكىنىسى بولدى. بىرنەشە كۇن بويى ءتىرى قالعانداردى ىزدەۋ-قۇتقارۋ جۇمىستارى جۇرگىزىلدى. جەر سىلكىنىسىنەن سوڭ سەگىز كۇن وتكەننەن كەيىن جەرگىلىكتى بيلىك 1500-گە جۋىق تۇرعىننىڭ قازا تاپقانىن حابارلادى.
جەر سىلكىنىسىنىڭ وشاعى كورشىلەس تۇركيانىڭ كاحرامانماراش پروۆينسياسىندا بولعان. مۇندا پرەزيدەنت رەجەپ تايىپ ەردوعان ايتقانداي، 49 مىڭنان استام ادام اپاتتىڭ قۇربانى بولدى. ماگنيتۋداسى 7،7 جانە 7،6 بولاتىن دۇمپۋلەر ەكى ەلدە توعىز ساعاتتىق ارالىقپەن بولدى. ونىڭ اسەرى ليۆان، ليۆيا، گرۋزيا، ارمەنيا، يزرايل جانە كيپردە دە سەزىلدى.
انكارا جەر سىلكىنىسىن «عاسىر اپاتى» دەپ اتادى.