ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ بيىل ۇبت ەرەجەلەرىن بۇزۋ 4 ەسە ازايعانىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«تەستىلەۋ قورىتىندىسى بويىنشا، 103 مىڭنان استام تالاپكەر شەكتى بالل جينادى. بۇل قاتىسۋشىلاردىڭ جالپى سانىنىڭ 67%-ىن قۇرايدى. وتكەن جىلمەن سالىستىرعاندا، بۇل كورسەتكىش 7% جوعارى. تەستىلەنۋشىلەردىڭ 51 مىڭعا جۋىعى (33%-ى) شەكتى بالل جيناي المادى. ۇبت ورتاشا بالى - 66. بيىل ەڭ جوعارى بالل – 139. 3179 وقۋعا ءتۇسۋشى 120 بالدان جوعارى جينادى»، - دەدى ول ورتالىق كوممۋنيكاسيالار قىزمەتىندە وتكەن بريفينگىدە.
سونداي-اق، ول ۇبت-عا تىيىم سالىنعان زاتتاردى كىرگىزۋ ارەكەتتەرى مەن ۇبت ەرەجەلەرىن بۇزۋ سانى ءبىرشاما ازايعانىن ءمالىم ەتتى.
«ماسەلەن، بىلتىر 756 تۇلەك ۇبت-عا تىيىم سالىنعان زاتتاردى الىپ وتۋگە تىرىسسا، بيىل 327 جاعداي تىركەلدى. بۇل 2020 جىلى ەرەجە بۇزۋعا تىرىسقان قاتىسۋشىلاردى تەستىلەۋگە جىبەرمەۋ تۋرالى نورمانىڭ ەنگىزىلۋى مەن ءاربىر تەستىلەنۋشى ءۇشىن فرونتالدى كامەرا ورناتۋعا بايلانىستى. تەستىلەۋ كەزىندە ەرەجە بۇزعانى ءۇشىن 322 ادام اۋديتوريادان شىعارىلىپ، ناتيجەسى جويىلدى. كورسەتكىش 4 ەسە تومەندەگەن. سەبەبى 2021 جىلى اۋديتوريادان 1305 ادام شىعارىلعان بولاتىن»،- دەدى رۋسلان ەمەلبايەۆ.
ايتا كەتەيىك، بۇعان دەيىن ۇبت-عا وقۋشىلاردىڭ شپارگالكا، تەلەفون الىپ كىرگەنى حابارلانعان ەدى.