Almaty-akshamy.kz سايتىنىڭ بۇگىنگى جاڭالىقتار لەنتاسىنا شولۋ – كۇن كەرۋەنى
الماتىداعى ءۇشىنشى ۆوكزال
مادەنيەت شاعىن اۋدانى ماڭىندا سالىنادى. پلاتفورمانى «قازاقستان تەمىر جولى» سالادى. بۇل جوبا الماتىنىڭ 2040 جىلعا دەيىنگى باس جوسپارىندا جانە كولىك قاڭقاسىنىڭ جوسپارىندا كورىنىس تاپقان. الاتاۋ اۋدانىنداعى الماتى-3 ۆوكزالىنىڭ قۇرىلىسى اگلومەراسيانى دامىتۋ جونىندەگى جوبالار كەشەنىنە كىرەدى. جاڭا تەمىرجول پلاتفورماسى جۇك جانە جولاۋشىلار لەگىنىڭ ءبىر بولىگىن قايتا باعدارلاۋعا، سونىمەن قاتار، اينالىمعا قوسىمشا جولاۋشىلار پويىزدارىن قوسۋعا مۇمكىندىك بەرەدى، سونىڭ ەسەبىنەن قالالىق اۆتوجول ينفراقۇرىلىمىنىڭ كولىك جۇكتەمەسى ازايادى.
سۋدان «العان» العاشقى التىن
قاتار استاناسى دوحادا ءوتىپ جاتقان سۋ سپورتى تۇرلەرىنەن الەم چەمپيوناتىندا قازاقستان سپورتشىلارى تاريحتا العاش رەت التىننان القا تاقتى. ەدۋارد كيم مەن نارگيزا بولاتوۆا جۇبى تەحنيكالىق باعدارلامادا چەمپيون اتاندى. ۇلتتىق قۇرامانىڭ قوس سپورتشىسى فينالدا 228،0050 ۇپاي جينادى. تورەشىلەر باعدارلاما قيىندىعى جاعىنان ولاردىڭ ونەرىن جوعارى باعالادى. بۇل قازاقستان اتلەتتەرىنىڭ سۋ سپورتى تۇرلەرىنەن الەم چەمپيوناتىندا قول جەتكىزگەن العاشقى التىن مەدالى.
«دجەتلاگقا» شالدىقپايىق!
ەلىمىزدە ءبىرىڭعاي ۋاقىت بەلدەۋىنە كوشۋ تۋرالى قاۋلى قابىلداندى. كەلەسى ايدان باستاپ قازاقستاندىقتار ءبىر ۋاقىتپەن جۇرەتىن بولادى. ۋاقىت بەلدەۋىنەن قالىس نە وزىق ءجۇرۋ «دجەتلاگ» سيندرومىنا شالدىقتىرادى ەكەن. ءبىز ۋاقىتتى 1 ساعات جىلجىتامىز دەپ جاتىرمىز.
ءار ەلدىڭ ۋاقىتى گەوگرافيالىق جاعدايىنا قاراي مەريديان سىزىعى بويىنشا بەلگىلەنگەن. ساعات ولشەمى ادامداردىڭ ءومىرىن جەڭىلدەتۋ ءۇشىن ويلاپ تابىلعان. ال «دجەتلاگ» سيندرومىنا شالدىققان ادامنىڭ ۇيقىسى قانبايدى. سوسىن ءىسى دە ونبەيدى. مۇنىڭ سىرتىندا وبىر، ديابەت، قان تامىرلارى جۇيەسى اۋرۋلارىن تۋعىزادى. اسىرەسە قاتەرلى ىسىككە شالدىعۋ ءقاۋپى 15%-كە ارتادى ەكەن.
ازىرگە 4-ورىندامىز
تاشكەنتتە اۋىر اتلەتيكادان ازيا چەمپيوناتى باستالدى. جارىستىڭ ءبىرىنشى كۇنىندە قازاقستاننىڭ اتىنان اينۇر ابدىقالىقوۆا ءوز ونەرىن ورتاعا سالدى. 45 كەلىگە دەيىنگى سالماقتا كۇش سىناسقان وتانداسىمىز جۇلقا كوتەرۋدە 62 كەلى، ال سەرپە كوتەرۋدە 75 كەلىنى باعىندىرىپ، ەكى جاتتىعۋدىڭ قورىتىندىسى بويىنشا 137 كەلىمەن 4-ورىنعا تابان تىرەدى. الداعى كۇندەرى جارىس جولىنا تاعى 6 وتانداسىمىز شىعادى.
اۆتوكولىك قۇجاتى ءۇشىن مامانداندىرىلعان حقو-عا بارماي-اق قويىڭىز
قاڭتاردان باستاپ الماتىلىق اۆتوكولىك يەلەرى ونلاين راسىمدەگەن قۇجاتتارىن مامانداندىرىلعان حقو-لارعا بارماي-اق الا الاتىن بولدى. ەندى الماتى قالاسى جاندوسوۆ كوشەسى، 51 مەكەنجايىندا ورنالاسقان اۋەزوۆ اۋداندىق حقو عيماراتىنىڭ 2ء-شى قاباتىندا ونلاين فورماتتا راسىمدەلگەن دايىن قۇجاتتاردى بەرۋ سەكتورى جۇمىس ىستەيدى. مۇندا “كولىك قۇرالدارىن تىركەۋ” جانە “جۇرگىزۋشى كۋالىكتەرى” بويىنشا دايىن قۇجاتتاردى الۋعا بولادى.
دايىن قۇجاتتاردى بەرۋ سەكتورى دۇيسەنبى مەن جۇما ارالىعىندا تاڭعى 9:00-دەن 18:00-گە دەيىن ءۇزىلىسسىز جۇمىس ىستەيدى.
جۇڭگو تالانتتىلاردى تارتپاق
جۇڭگو پرەمەر-مينيسترى لي سياننىڭ ايتۋىنشا، شەتەلدىك ماماندار قىتايدىڭ ەكونوميكالىق جانە الەۋمەتتىك دامۋىن ىلگەرىلەتۋدە جانە جۇڭگو مەن شەت ەلدەر اراسىنداعى الماسۋ مەن ىنتىماقتاستىقتى دامىتۋدا ماڭىزدى ءرول اتقارادى. جۇڭگو دا ساياساتتى وڭتايلاندىرىپ، زياتكەرلىك مەنشىك قۇقىعى مەن باسقا دا قۇقىقتاردى قورعاۋدى كۇشەيتىپ، دۇنيە ءجۇزىنىڭ تۇكپىر-تۇكپىرىنەن كەلگەن تالانتتاردىڭ قىتايدا جۇمىس ىستەپ، ءومىر سۇرۋىنە جاقسى جاعداي جاساماق.
QR-كودپەن دارىگەرگە دە باراسىز...
دەنساۋلىق ساقتاۋ ۆيسە-مينيسترى بەيبىت ەسەنبايەۆ مالىمدەۋىنشە، ەندى دارىگەردىڭ قابىلداۋىندا بولعانىڭىزدى QR-كود ارقىلى راستاۋعا بولادى.
بۇل جوبا ءقازىر استانا، الماتى جانە سولتۇستىك قازاقستان وبلىسىنىڭ كەيبىر ەمحانالارىندا ىسكە قوسىلدى. ەمدەلۋشى eGov ءموبيلدى قوسىمشاسى ارقىلى QR كودىن سكانەرلەيدى. قوسىمشا ناۋقاستىڭ ەمدى باستاعان ۋاقىتىن، مەديسينالىق ۇيىمنىڭ اتاۋىن، دارىگەردىڭ ءاتى-جونىن جانە ەمدى اياقتاعان ۋاقىتىن كورسەتەدى.
اكىمنىڭ ماستىعى ءالى تارقاماپتى
قاراعاندى وبلىسى، بۇقار جىراۋ اۋدانى، مۇستافين اتىنداعى اۋىلىنىڭ اكىمى قايرات قۇسايىنوۆ كولىكتى ماس كۇيىندە باسقارعانى ءۇشىن ۇستالدى. اكىمشىلىك سوت اكىمدى جەتى جىلعا كولىك جۇرگىزۋ قۇقىعىنان ايىرىپ، 15 تاۋلىككە قاماۋعا الدى.
ءدال وسى قايرات قۇسايىنوۆ 2018 جىلدىڭ 25 تامىزىندا دا ماس كۇيىندە كولىك جۇرگىزىپ بارا جاتقان جەرىنەن ۇستالىپ، ءۇش جىلعا كولىك جۇرگىزۋ قۇقىعىنان ايىرىلعان بولاتىن.
بۇل جولى قايرات قۇسايىنوۆتىڭ مەملەكەتتىك قىزمەتكەر رەتىندەگى تاعدىرى جازاسىن وتەپ شىققان سوڭ بەلگىلى بولماق.
ۇكىمەت وتستاۆكاعا كەتتى
مەملەكەت باسشىسى «قازاقستان رەسپۋبليكاسىنىڭ ۇكىمەتى تۋرالى» جارلىققا قول قويدى. پرەزيدەنت قاۋلىسىنا سايكەس:
- قازاقستان رەسپۋبليكاسى ۇكىمەتىنىڭ ورنىنان ءتۇسۋى قابىلدانسىن.
- قازاقستان رەسپۋبليكاسى پرەمەر-مينيسترى مىندەتتەرىن ۋاقىتشا اتقارۋ رومان ۆاسيليەۆيچ سكليارعا جۇكتەلسىن.
- قازاقستان رەسپۋبليكاسى ۇكىمەتىنىڭ مۇشەلەرى ۇكىمەتتىڭ جاڭا قۇرامى بەكىتىلگەنگە دەيىن ءوز مىندەتتەرىن اتقارۋدى جالعاستىرا بەرسىن.
- وسى جارلىق قول قويىلعان كۇنىنەن باستاپ قولدانىسقا ەنگىزىلەدى.
"التىن وردانىڭ" بۇرىنعى باسشىسى سوتتالدى
ەرمەك مارقابايەۆقا 296-باپتىڭ 4-بولىگى "ەسىرتكى، پسيحوتروپتىق زاتتارمەن، سول تەكتەستەرمەن وتكىزۋ ماقساتىنسىز زاڭسىز جۇمىس ىستەۋ" بويىنشا ايىپ تاعىلدى.
سوت ۇكىمى بويىنشا، قك-نىڭ 296-بابى 4-بولىگىندە كوزدەلگەن قىلمىستىق قۇقىق بۇزۋشىلىقتى جاساعانى ءۇشىن كىنالى دەپ تانىلىپ، وعان 4 جىل مەرزىمگە باس بوستاندىعىنان ايىرۋ جازاسى تاعايىندالدى.