الماتى جاستارىنا كاسىپكەر ەلدوس ايبەكوۆ تايم-مەنەدجمەنت قۇپيالارىمەن ءبولىستى
الماتى قالاسىنىڭ اۋەزوۆ اۋدانىنداعى كوميۋنيتي-ورتالىقتا «جۇمىسشى ماماندىقتار جىلى» اياسىندا ۇيىمداستىرىلعان ەرەكشە سەمينار ءوتتى. ءىس-شارانىڭ باستى تاقىرىبى – تايم-مەنەدجمەنت، ياعني ۋاقىتتى ءتيىمدى باسقارۋ بولدى. بۇل تۋرالى Aqshamnews.kz سايتى حابارلايدى.
سەميناردىڭ ماقساتى – كوللەدج ستۋدەنتتەرى مەن جاس ماماندارعا كاسىبي ءوسۋدىڭ نەگىزگى قۇرالى رەتىندە ۋاقىتتى دۇرىس پايدالانۋدىڭ ماڭىزىن ءتۇسىندىرۋ. لەكسيانى تانىمال كاسىپكەر، بىرنەشە بيزنەس سالاسىندا تاجىريبەسى بار ەلدوس ايبەكوۆ وتكىزدى.
«ءۇش رەت بانكروت بولدىم – ءبىراق العا ۇمتىلۋدان جالىقپادىم»
ەلدوس ايبەكوۆ – تاجىريبەلى كاسىپكەر، ءومىر جولىندا كوپتەگەن قيىندىقتاردى باستان كەشىرگەن. ول جاس تىڭدارماندارعا شىنايى مىسال كەلتىرىپ، موتيۆاسيا بەردى:
«مەن ءۇش رەت بانكروت بولدىم. ەڭ ۇلكەن قارىزىم – 700 مىڭ اقش دوللارى. ءبىراق ەشقاشان توقتاعان ەمەسپىن. ساتسىزدىكتەر – بۇل ساباق. ەڭ باستىسى – ناقتى جوسپارلاۋ، ال ونىڭ نەگىزىندە تايم-مەنەدجمەنت تۇرادى»، – دەدى سپيكەر.
كاسىپكەر جاستارعا ناقتى كەڭەستەر بەرىپ، ولاردىڭ باستى قاتەلىكتەرىنىڭ ءبىرى – ىستەردىڭ رەتىن دۇرىس انىقتاي الماۋى ەكەنىن اتاپ ءوتتى.
جاڭا كىتاپ – جاس كاسىپكەرلەرگە ارنالعان قۇرال
ايتا كەتەرلىگى، ەلدوس ايبەكوۆ «جۇمىسشى ماماندىقتار جىلى» اياسىندا «بيزنەس پەن كاسىپكەرلىكتىڭ نەگىزدەرى» اتتى وقۋ-ادىستەمەلىك قۇرالىن جارىققا شىعاردى. بۇل ەڭبەك شاعىن جانە ورتا بيزنەستىڭ (شوب) اتلاسى نەگىزىندە دايىندالعان.
«كوللەدج تۇلەكتەرى ءجيى بيزنەسكە بەت بۇرادى. سول سەبەپتى بۇل كىتاپ ولار ءۇشىن وتە وزەكتى. ونىڭ ىشىندە ينتەراكتيۆتى ويىندار، پرەزەنتاسيالار مەن بەينەساباقتار بار، بۇل ۇستازدارعا دا كومەكتەسەدى»، – دەيدى اۆتور.
جاستاردىڭ پىكىرىنشە – موتيۆاسيا مەن ءتارتىپ ماڭىزدى
سەمينارعا قاتىسقان ستۋدەنتتەر كوۋچتىڭ دارىسىنەن ۇلكەن اسەر العاندارىن ايتتى. ماسەلەن، ستۋدەنت ەرالى باحبەرگەن:
«ەيزەنحاۋەر ماتريساسى وتە ۇنادى. ول ماڭىزدى جانە شۇعىل ىستەردى بولۋگە كومەكتەسەدى. مەن ءوز ۋاقىتىمدى ۇتىمدى پايدالانۋعا تىرىسامىن. گەنري فوردتىڭ “ۋاقىت بوسقا كەتۋدى ۇناتپايدى” دەگەن سوزىمەن كەلىسەمىن»، – دەدى.
اۋەزوۆ اۋدانى جاستارى ءۇشىن – جىل بويى پايدالى ءىس-شارالار
كوميۋنيتي-ورتالىق جەتەكشىسى، UAQYT قوعامدىق قورىنىڭ ءتوراعاسى باۋىرجان ماحامبەت سەميناردىڭ جاستار تاربيەسىندەگى ماڭىزىنا توقتالدى:
«كوپ جاستار ۋاقىتىن سمارتفونعا جۇمساپ، تەك كوڭىل كوتەرۋمەن شەكتەلىپ جاتادى. ال شىن مانىندە بۇل ۋاقىتتى ءوز دامۋىنا ارناۋعا بولادى. ءبىز وسى جىلى اۋەزوۆ اۋدانىنداعى 14 پەن 35 جاس ارالىعىنداعى 32 مىڭعا جۋىق جاس ءۇشىن كوپتەگەن ءىس-شارا ۇيىمداستىرامىز»، – دەدى ول.
جۇمىسشى ماماندىقتار جىلى – تەك ماماندىق تاڭداۋدىڭ ەمەس، سونىمەن قاتار ءوزىن-وزى دامىتۋدىڭ، ەڭبەككە دەگەن قۇرمەت پەن تارتىپكە نەگىزدەلگەن كوزقاراستىڭ قالىپتاسۋ كەزەڭى. ەلدوس ايبەكوۆتىڭ تاجىريبەسى مەن كەڭەستەرى الماتىلىق جاستارعا باعىت-باعدار بەرىپ، ۋاقىتتى ءتيىمدى باسقارۋدىڭ ناقتى جولدارىن ۇسىندى.