تىيىم سالىنعان قۇرالدارمەن بالىق اۋلاعان جاعدايدا سالىناتىن ايىپپۇل كولەمى وسەدى جانە زاڭسىز ارەكەت قايتالانعان جاعدايدا ايىپتىنى قاماۋعا الۋ جاۋاپكەرشىلىگى قاراستىرىلىپ جاتىر. بۇل تۋرالى ەكولوگيا جانە تابيعي رەسۋرستار مينيسترلىگى بالىق شارۋاشىلىعى كوميتەتى ءتوراعاسىنىڭ ورىنباسارى ايان باحيانوۆ ايتىپ بەردى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«اكىمشىلىك قۇقىق بۇزۋ كودەكسىنە سايكەس، تىيىم سالىنعان قۇرالمەن بالىق اۋلاعان جەكە جانە زاڭدى تۇلعالارعا 20 اەك (ايلىق ەسەپتىك كورسەتكىش) ايىپپۇل كوزدەلگەن. بۇگىندە ءبىزدىڭ مينيسترلىك اتالعان كودەكس باپتارىنا ءتيىستى وزگەرىستەر ەنگىزىپ جاتىر. سونىڭ ناتيجەسىندە ايىپپۇل كولەمىن 50 اەك دەيىن ارتتىرۋ كوزدەلىپ وتىر»، - دەدى ايان باحيانوۆ ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، ايىپتى ءبىر جىل ىشىندە زاڭسىز ارەكەتىن ەكىنشى رەت قايتالاسا قاماۋعا الىنادى.
«زاڭ بۇزۋشى ءبىر جىلدىڭ ىشىندە تىيىم سالىنعان قۇرالمەن بالىق اۋلاۋ فاكتىسى بويىنشا ەكىنشى رەت ۇستالسا، ياعني قايتالاسا، وندا ايىپتىنى 15 تاۋلىككە قاماۋ جازاسى قاراستىرىلادى»، - دەيدى ەكولوگيا مينيسترلىگىنىڭ وكىلى.