8 شىلدە كۇنى ماسك Twitter-گە كەلىسىم شارتتارىن بۇزعانىن ايتىپ، ساتىپ الۋ مامىلەسىنەن باس تارتقانىن حابارلاعان.
Twitter باسشىلىعى الەۋمەتتىك جەلىنى ساتىپ الۋ مامىلەسىن اياقتاۋ ءۇشىن Tesla باسشىسى يلون ماسكتىڭ ۇستىنەن اقش سوتىنا شاعىم ءتۇسىردى، دەپ حابارلايدى Almaty-akshamy.kz Interfax.ru سىلتەمە جاساپ.
«تۆيتتەر بۇل تالاپتى ماسكتى ودان ءارى بۇزۋعا جول بەرمەۋ، ماسكتى ءوزىنىڭ زاڭدى مىندەتتەرىن ورىنداۋعا ماجبۇرلەۋ جانە بىرنەشە شارتتار ورىندالعان جاعدايدا بىرىكتىرۋ وپەراسياسىن اياقتاۋعا ماجبۇرلەۋ ءۇشىن بەرەدى»، - دەلىنگەن دەلاۆەر كانسەرلىك سوتىنا جىبەرىلگەن قۇجاتتا.
8 شىلدەدە ماسك Twitter-گە كەلىسىم شارتتارىن بۇزعانىن ايتىپ، ساتىپ الۋ مامىلەسىنەن باس تارتقانىن حابارلادى. ماسك وكىلىنىڭ كومپانياعا جازعان حاتىندا بۇل شەشىم الەۋمەتتىك جەلىنىڭ ماسكقا پلاتفورماداعى جالعان نەمەسە سپام-اككاۋنتتاردىڭ سانى تۋرالى اقپاراتتى بەرۋدەن باس تارتۋىمەن نەمەسە بەرە الماۋىمەن ءتۇسىندىرىلدى.
سول كۇنى Twitter باسشىلىعى ماسكتى سوتقا بەرۋگە نيەتتى ەكەنىن مالىمدەدى.
Twitter 25 ساۋىردە ماسكتىڭ 44 ميلليارد دوللارلىق ۇسىنىسىن قابىلدادى. دەگەنمەن، مامىر ايىنىڭ ورتاسىندا كاسىپكەر Twitter الەۋمەتتىك جەلىدەگى جالعان اككاۋنتتاردىڭ ۇلەسىنە قاتىستى جاعدايدى تۇسىندىرمەيىنشە، كەلىسىمدە بۇدان بىلاي وزگەرىس بولمايتىنىن ايتقان بولاتىن.
ماۋسىم ايىندا ماسك كومپانيانىڭ وعان سۇرالعان دەرەكتەردى بەرۋدەن باس تارتۋىنا بايلانىستى مامىلەنى توقتاتامىن دەپ قورقىتتى. سودان كەيىن Twitter وكىلى كومپانيا كەلىسىم شارتتارىنا سايكەس مامىلەنى جابۋ ءۇشىن ماسكپەن اقپارات الماسۋدى جالعاستىرىپ جاتقانىن جەتكىزگەن.