فۋرشەت قازىرگى كۇنى قوعامنىڭ اجىراماس بولىگىنە اينالدى. كەلەلى باسقوسۋلاردا، كونفەرەنسيا، فورۋمداردا سول ءىس-شارا ءوتىپ جاتقان عيماراتتا داستارحان جايىلادى. ادامدار ۇستەل اينالاسىندا تۇرىپ تاماقتانادى. فۋرشەت دەگەن سول. ياعني ۋاقىت تا ۇنەمدەلەدى، ادام قاراسىنىڭ كوپتىگىنەن ورىن دا سىيىمدى بولادى.
ءبىراق قارا سۋدىڭ ءوزىن وتىرىپ ءىشۋ كەرەك، اسىعىس بولساڭ دا تىزە بۇگىپ، نان اۋىز تي دەپ جاتامىز. تۇرعان كۇيدە تاماقتانۋ زيان ەمەس پە؟ پايداسى بار ما؟ بۇل ساۋالىمىزعا № 21 قالالىق ەمحاناعا قاراستى «كەمەل» وتباسىلىق دارىگەرلىك امبۋلاتوريانىڭ جالپى پراكتيكا دارىگەرى ءنازيرا قۋلەبايەۆا جاۋاپ بەرەدى.
– تاماقتى تۇرىپ جەۋگە بولمايدى دەپ ايتۋ داۋلى ماسەلە. بۇل بىرەۋگە زيان، ال بىرەۋگە كەرىسىنشە پايدالى بولۋى مۇمكىن. جالپى، ادام تاماقتى تۇرىپ جەگەندە، ول اعزاعا قاجەت مولشەردەن كوپ تاماق جەي الادى. اسقازان سوزىلۋى جانە بۇل اسقازاننىڭ لەتارگياسىنا اكەلۋى ىقتيمال. سونىمەن قاتار شامادان تىس تاماقتانۋ سەمىزدىككە اكەلۋى مۇمكىن. سونداي-اق، فۋرشەتتەردە تەك قاتتى تاعامدار بەرىلەدى، ولاردى مۇقيات شايناۋ كەرەك. رەسمي ءىس-شارالاردا ادام تىكەسىنەن تىك تۇرادى. سوندىقتان ادام ءوزىن ۇيدەگىدەگىدەي جايلى ەمەس، ىڭعايسىز سەزىنۋى مۇمكىن. تاماقتى اسىعىس، ءارى تولىعىمەن شايناماي جەي بەرۋى مۇمكىن. بۇل اسقازانعا اۋىرلىق ءتۇسىرىپ، اس قورىتۋ جۇمىسىن قيىنداتادى. دەگەنمەن، تۇرىپ تاماقتانۋدىڭ جاعىمدى جاقتارى دا بار. بۇل اسقازان قىجىلى مەن گاستروەزوفاگەالدى رەفليۋكس اۋرۋىنىڭ بەلگىلەرىن جەڭىلدەتۋى مۇمكىن. ويتكەنى رەفليۋكس اسقازانداعى شامادان تىس قىسىمنان تۋىندايدى. سونداي-اق، ادام تۇرىپ جەگەندە، وتىرىپ تاماقتانعانعا قاراعاندا كوبىرەك ەنەرگيا جۇمسايدى. بۇل سالماق تاستاعىسى كەلەتىندەر ءۇشىن ءتيىمدى. اۋىرمايىق، اعايىن!