الماتى قالالىق الەۋمەتتىك ءال-اۋقات باسقارماسىنىڭ باسشىسى ءنازيرا توعىزبايەۆا وڭىرلىك كوممۋنيكاسيالار قىزمەتىنىڭ بريفينگىندە تۇرمىستىق زورلىق-زومبىلىق ماسەلەسى قالاي شەشىلىپ جاتقانىن ايتتى. ول «جان سايا» داعدارىس ورتالىعى قالادا 2017 جىلدان بەرى جۇمىس جاساپ كەلە جاتقانىن اتاپ ءوتتى. بيىل وعان 75 ايەل مەن 157 بالا ءوتىنىش بەرگەن، دەپ حابارلايدى almaty-akshamy.kz
اتاپ ايتساق، «جان سايا» وتباسىلىق زورلىق-زومبىلىق قۇرباندارى ءۇشىن ارنايى جاسالعان. مۇندا زارداپ شەككەندەرگە باسپانا، قۇقىقتىق، پسيحولوگيالىق جانە الەۋمەتتىك قولداۋ كورسەتىلەدى. ورتالىق سونىمەن قاتار بالالارعا ارنالعان ءتۇرلى ءىس-شارالار وتكىزەدى جانە «150» سەنىم تەلەفونى بار.
سونىمەن قاتار، الماتىدا تۇراقتى تۇراتىن جەرى جوق ادامدار ءۇشىن قۇرىلعان «پانا» الەۋمەتتىك قىزمەت كورسەتۋ ورتالىعى جۇمىس ىستەيدى. جىل باسىنان بەرى 466 ءوتىنىش بەرۋشىگە كومەك كورسەتىلدى، ولاردىڭ بارلىعى ۋاقىتشا تۇرعىن ۇيمەن قامتاماسىز ەتىلدى.
«ورتالىق ماماندارى قۇجاتتاردى قالپىنا كەلتىرۋگە كومەكتەسەدى. مىسالى، «پاناعا» ەشقانداي قۇجاتى جوق 67 جاستاعى ەر ازامات جۇگىنگەن. 1974 جىلعى ءتولقۇجاتىن جوعالتىپ العان. مامانداردىڭ كومەگىنىڭ ارقاسىندا ول جەكە كۋالىك الۋعا، سونداي-اق قارتتىق بويىنشا زەينەتاقى تاعايىنداۋعا مۇمكىندىك الدى. قازىرگى ۋاقىتتا «شاڭىراق» ارنايى قىزمەتتەر ورتالىعىنا اۋىستىرىلدى، - دەدى ءنازيرا توعىزبايەۆا.
الماتىدا جالعىزباستى زەينەتكەرلەر، مۇگەدەكتەر، جالعىزباستى ەرلى-زايىپتىلار جانە زەينەتكەرلىك جاستاعى ەرلى-زايىپتىلار ءۇشىن ەلىمىزدەگى ەرەكشە «قامقور» الەۋمەتتىك ءۇيى جۇمىس جاسايدى، مۇندا 50 ادام تۇرىپ جاتىر.
«بۇل ءۇي كوپ قاباتتى، اينالاسى قورشالعان. تۋىستارىنىڭ قاراۋىنسىز قالعان اعا بۋىن قالا تۇرعىندارى پاتەرلەرىن مەملەكەت مەنشىگىنە وتكىزىپ، وسى ۇيگە كوشە الادى»، - دەدى الەۋمەتتىك ءال-اۋقات باسقارماسىنىڭ باسشىسى.
بۇل ۇيدە تۇراتىن زەينەتكەرلەر قىزمەتكەرلەردىڭ تۇراقتى باقىلاۋىندا.