تۇركسوي-دىڭ باس حاتشىسى سۇلتان رايەۆ تۇركولوگ-عالىم قارجاۋباي سارتقوجا ۇلىنىڭ قازاسىنا بايلانىستى كوڭىل ايتتى:
بەلگىلى تۇركولوگ عالىم، پروفەسسور، ورحون-ەنيسەي رۋنيكالىق كونە جازبالارىنىڭ تانىمال زەرتتەۋشىسى، تۇركى الەمىنىڭ كورنەكتى تۇلعاسى قارجاۋباي سارتقوجا ۇلىنىڭ دۇنيەدەن وتكەنى تۋرالى قارالى حابار قابىرعامىزدى قايىستىردى.
جاستايىنان ايگىلى اكادەميك الكەي مارعۇلاننان باتا الىپ، تۇرىك مەملەكەتتەرىنىڭ كوپتەگەن عالىمدارىنا ۇستاز بولعان تانىمال تۇركولوگ اعامىزدىڭ دۇنيە سالۋى كۇللى تۇركى عىلىمى ءۇشىن ورنى تولماس اۋىر قازا.
قارجاۋباي سارتقوجا ۇلى ءومىرىنىڭ سوڭىنا دەيىن قولىنان قالامىن تاستاماي، بار ءومىرىن عىلىمنىڭ دامۋىنا ارناعان ناعىز عالىم. ايبىندى اتالارىمىز سياقتى كۇندىز وتىرماي، ءتۇن ۇيىقتاماي تۇرىك ۇلىسى ءۇشىن ەسەلى ەڭبەك ەتتى. تۇركىنىڭ تەرەڭ تاريحىنىڭ قۇپياسىن اشىپ، بايىرعى بابالارىمىزدىڭ رۋھىن تىرىلتۋگە زور ۇلەس قوستى. تاريحي جادىمىزدى جانداندىرىپ، تۇركىلىك سانامىزدى سىلكىنتتى.
اعامىز تۇركىلەردىڭ بايىرعى اتاقونىسىن دا جىلدار بويى زەرتتەپ، ءاربىر تاسىن زەردەلەپ، كوپتەگەن تاريحي قورىمدارعا ارحەولوگيالىق قازبا جۇمىستارىن جۇرگىزدى.
عالىمنىڭ “تۇركى قاعاناتتارى”، «بايىرعى تۇرىك جازبالارىنىڭ گەنەزيسى» تۋىندىلارى، «ورحون ەسكەرتكىشتەرىنىڭ تولىق اتلاسى» ءۇش تومدىعى، «كونە تۇركى جازبا ۇلگىلەرى: ورحون مۇرالارى»، «ءۇيسىن حاندىعى»، «تاستا قالعان تاعىلىم»، «تاس كىتاپتىڭ قۇپياسى»، «زاپيسكي كازاحسكوگو تيۋركولوگا” جانە «بابا ءتىلىنىڭ بايىرعى مۇراسى: زەرتتەۋلەر» سىندى وزگە دە ىرگەلى ەڭبەكتەرى تۇركى عىلىمي قاۋىمداستىعىنىڭ جوعارى باعاسىنا يە بولدى.
وراساڭ زور ەڭبەكتەرى ءۇشىن قارجاۋباي اعامىزعا حالىقارالىق شىڭعىسحان اكادەمياسىنىڭ اكادەميگى اتاعى بەرىلىپ، اتاتۇرىك اتىنداعى حالىقارالىق ءتۇرiك تاريح اكادەمياسىنىڭ مۇشەلىگىنە قابىلداندى.
عالىمنىڭ ەڭبەكتەرى كوپتەگەن شەتەل تىلىنە اۋدارىلىپ، تۇركىنىڭ باي تاريحى تۋرالى دەرەكتەردىڭ الەمدىك عىلىمي اينالىمعا تۇسۋىنە دە ولشەۋسىز ۇلەس قوستى. تۇركىلەردىڭ ءوز داۋىرىندە يننوۆاسيالىق ريەۆوليۋسيا، ۇلكەن وركەنيەت پەن مادەنيەت جاساعان حالىق ەكەنىن الەمگە ناقتى عىلىمي دالەلدەرمەن كورسەتتى.
سوڭىندا مول رۋھاني قازىنا قالدىرعان قارجاۋباي سارتقوجا ۇلىنىڭ تۇركى تاريحىنا قوسقان ۇشان-تەڭىز ەڭبەگى تۇركى الەمى ءۇشىن ماڭگىلىك مۇرا، ولمەس رۋھاني ازىق.
مارقۇمنىڭ يمانى جولداس بولسىن! بارلىق تۇركى حالقىنا، وتباسى، تۋعان-تۋىستارىنا قايعىرىپ كوڭىل ايتامىن!
ارداقتى اعامىزدىڭ اتى مەن جازعان حاتى تۇرىك حالىقتارىنىڭ جادى مەن جۇرەگىندە ماڭگى جاساي بەرەدى.