تۇركىستاندىق وقۋشى ءوزى جۇرەتىن «اقىلدى سومكە» جاساپ شىعاردى. سومكەنى يەسى پۋلتپەن باسقارىپ جىلجىتا الادى، دەپ حابارلايدى Almaty-akshamy.kz.
قيسىق جول مەن شوقالاقتان دا وڭاي وتكىزۋگە بولادى. «تورتكۇل» جالپى ورتا مەكتەبىندە وقيتىن ايتۋار سوۆەتبەك ءوزى ويلاپ تاپقان سومكەنى ساباققا ۇستاپ، كوپتى تاڭقالدىردى. وعان بۇل وي مۇقتاجدىقتان تۋعان.
ايتۋار 1 جىل بۇرىن جول اپاتىنا ءتۇسىپ، كۇردەلى وتا جاسالادى. دارىگەرلەر ۇزاق ۋاقىت اۋىر زات كوتەرۋگە تيىم سالادى، ءتىپتى كىتاپ-داپتەر كوتەرۋگە دە بولمايتىنىن ايتقان. ساباقتا قالعىسى كەلمەگەن وزات وقۋشى تىعىرىقتان شىعار جول ىزدەپ تاپتى.
«ۇيدە جاتىپ وقۋ قيىن، قاتارىڭنان قالىپ قويعانداي كۇي كەشەسىڭ. مەكتەپكە بارايىن دەسەم دەنساۋلىعىم جارامادى، وقۋ-قۇرالىمدى تاسيتىن ءبىر ادام كەرەك. ال ۇيدەگىلەردىڭ جۇمىسى بار، ۇنەمى مەنىڭ قاسىمدا جۇرمەيدى عوي. سوسىن كىتاپتارىمدى تاسۋ ءۇشىن پۋلتپەن جۇرەتىن سومكەم بولسا دەپ ويلاپ، ونى الدىمەن قاعاز، كارتوننان جاساپ كوردىم. پلاستماسسا جاشىگىن ودان باسقا بىرنەشە ماتەريالدى پايدالانىپ، تيىمدىلىگىن تەكسەردىم. ەڭ ءبىرىنشى سومكەم پلاستماسسادان جاسالدى، كىتاپ-داپتەرلەرىمدى سالىپ مەكتەپكە دەيىن بارامىن. ال ساتىدان كوتەرۋگە سىنىپتاستارىم كومەكتەسەدى»، -دەيدى ايتۋار.
ايتۋاردىڭ بۇل يدەياسىن اناسى دا قولداپ، ديزايننىنا ءمان بەرەدى. ۇلى ويلاپ تاپقان سومكەنىڭ سىرت ءپىشىنىن جاساۋعا كومەكتەسكەن. ءقازىر تۇركىستاندىق وقۋشى جىلجىمالى سومكەنى ودان ءارى دامىتۋ ۇستىندە، ساتىدان ءوزى شىعاتىن مەحانيزم جاساپ، ءونىمىن ساتىلىمعا دا شىعارۋ ويىندا بار.