ۇلتتىق سپورتتى ۇلىقتاۋ
تۇركىستان وبلىسىندا كوشپەندىلەر ويىندارى ءوتتى. جاستار ءداستۇرلى سپورت تۇرلەرىنەن جارىسقا ءتۇستى، دەپ حابارلايدى Almaty-akshamy.kz
قازاقتىڭ ۇلتتىق ويىندارىنىڭ ىشىندەگى ەڭ قىزىقتىسى – اۋدارىسپاق. اتقا قونعان كىل مىقتىلار ىشىنەن ەرەجە بويىنشا قارسىلاسىن قاعىپ تۇسىرگەنى جەڭىمپاز اتانادى. سونداي-اق قوشقار كوتەرىپ، جۇلدەلى ورىنعا ىلىگۋگە تالپىنعان جاستار دا تابىلدى.
بوزكىلەمدە قازاق كۇرەسىنەن كۇش سىناسقان پالۋاندار تارتىسى ويىنداردىڭ كوركىن قىزدىردى.
«بۇل – اتا-بابامىزدان كەلە جاتقان سپورت ءتۇرى. قازاق كۇرەسى – مىڭ جىلدىق تاريحى بار قازاقتىڭ برەندى. وسىنىڭ ارقاسىندا اتا-بابامىز سوعىستا دا جەڭىسكە جەتتى دەپ ايتا الامىن. نەگىزى سامبو، دزيۋدودا كۇرەسەمىن، ءبىراق قازاق كۇرەسى وتە قاتتى ۇنايدى»، - دەيدى پالۋان يسلامبەك يلياسقاجى.
اۋقىمدى سايىستا قازاقتىڭ ۇلتتىق تاعىمىنان دا ءدام تاتۋعا بولادى. كيىز ۇيدە ارنايى جايىلعان داستارحانعا اجەلەر كەڭەسىنىڭ ءمازىرى قويىلعان. كەلگەن قوناقتارعا تاعامنىڭ ءتۇرى مەن جاساۋ تەحنولوگياسىن كورسەتىپ، ىنتىماق پەن بىرلىكتى ۇلگى ەتتى.
«مۇنىڭ ءبارى تاتۋلىققا، ىنتىماقتاستىققا باستاپ، بىر-بىرىمىزبەن ارا قاتىناسىمىز جوعارى دەڭگەيدە ەكەنىن كورسەتەدى. ءبىزدىڭ اۋدانىمىز – وتە ءتاتۋ-تاتتى تۇراتىن ىنتىماعى جاراسقان اۋدان»، - دەيدى اۋىل تۇرعىنى اقجارقىن باقورازوۆا.
وسىلايشا كوشپەندىلەر ويىنىن ۇيىمداستىرۋشىلار قازاق حالقىنىڭ مادەنيەتى مەن تاريحىنىڭ ماڭىزدى بولىگىن ساقتاپ قالۋعا ءوز ۇلەستەرىن قوستى. مۇنداي شارالار ايماققا تۋريستەر تارتۋعا دا اسەر ەتەدى.