بۇگىن تۇركىستان قالاسىنىڭ جاستارى مەن ەرىكتىلەرىن جانە ۇكىمەتتىك ەمەس ۇيىمداردىڭ باسىن قوسقان العاشقى پراكتيكۋم ءوتتى.
ءىس-شارانىڭ نەگىزگى ماقساتى – ەرىكتىلىكتىڭ قوعامداعى ماڭىزىن دارىپتەۋ، تۇركىستاندىق جاستاردىڭ ازاماتتىق بەلسەندىلىگىن ارتتىرۋ جانە الەۋمەتتىك جاۋاپكەرشىلىك قۇندىلىقتارىن نىعايتۋ. سونىمەن قاتار، ەرىكتىلەردى الەۋمەتتىك كاسىپكەرلىككە بەيىمدەۋ ارقىلى ولاردىڭ قارجىلاي تۇراقتىلىعىن قالىپتاستىرۋ كوزدەلگەن.
پراكتيكۋم بارىسىندا قاتىسۋشىلار الەۋمەتتىك كاسىپكەرلىكتىڭ قىر-سىرىمەن تانىسىپ، حالىقارالىق جانە وتاندىق گرانتتارعا جوبا دايىنداۋ مەن پيچينگ تاسىلدەرىن ۇيرەندى. سونداي-اق تابىسقا جەتۋدىڭ ناقتى تاجىريبەلەرى مەن ۇيىمدىق برەندينگ قۇندىلىقتارى دا تالقىلاندى.
شاراعا تۇركىستان قالاسىنىڭ اكىمى ازىمبەك پازىلبەك ۇلى، تۇركىستان وبلىسى ءماسليحاتىنىڭ دەپۋتاتى ينارا نامازبايەۆا جانە وڭىرلىك الەۋمەتتىك كاسىپكەرلەر، ۇكىمەتتىك ەمەس ۇيىمنىڭ وكىلدەرى مەن قوعام بەلسەندىلەرى قاتىستى.
شارادا ءسوز العان ازىمبەك پازىلبەك ۇلى: "ەرىكتىلىكتىڭ قازاق حالقىنىڭ قانىنا سىڭگەن اسىل ءداستۇر" ەكەنىن اتاپ ءوتتى:
"ەرىكتىلەر – قوعامىمىزدىڭ رۋحاني تىرەگى. قازاقتىڭ "اسار" ءداستۇرى – سونىڭ ايقىن دالەلى. بۇگىنگى كۇنى الەۋمەتتىك كاسىپكەرلىك – مەملەكەت قولداپ وتىرعان، الەۋمەتتىك ماسەلەلەردى ءتيىمدى شەشۋگە مۇمكىندىك بەرەتىن قۋاتتى قۇرال. دەمەك، ەرىكتىلىك – تەك باستاما ەمەس، الەۋمەتتىك كاسىپكەرلىككە جول اشاتىن ۇلكەن ترامپلين"، – دەدى ول. سونداي-اق ول: "قازىرگى تاڭدا تۇركىستان قالاسىندا 257 ۇكىمەتتىك ەمەس ۇيىم بولسا، سونىڭ 130-ى قالادەڭگەيىندە تىركەلگەن. بۇل – اشىق قوعامنىڭ باستى كورسەتكىشى. ءاربىر ۇيىمنىڭ باستاماسى مەن ەڭبەگى قالامىزدىڭ دامۋىنا، الەۋمەتتىك ماسەلەلەردىڭ شەشىلۋىنە ىقپال ەتىپ وتىر. وسى رەتتە، سىزدەردىڭ بارلىق ۇسىنىستارىڭىزعا قۇلاق اسىپ، قولداۋعا ءارقاشان دايىنبىز" دەدى.
پراكتيكۋمنىڭ باستى سپيكەرى، الەۋمەتتىك يننوۆاتورلار قاۋىمداستىعىنىڭ پرەزيدەنتى، "Global kishkentai" ينكليۋزيۆتى شەبەرحاناسىنىڭ نەگىزىن قالاۋشى گۇلميرا پارمىشيەۆا تۇركىستان قالاسىندا جاستارعا وسىنداي مۇمكىندىك جاسالعانى ءۇشىن العىسىن ءبىلدىردى:
"الەۋمەتتىك كاسىپكەرلىكتى دامىتۋعا ارنالعان بۇل باستاما – تۇركىستان ءۇشىن ۇلكەن سەرپىلىس. اكىمدىككە جانە ۇيىمداستىرۋشىلارعا قولداۋ كورسەتكەندەرى ءۇشىن زور ريزاشىلىعىمدى بىلدىرەمىن"، – دەدى ول.
شارا قورىتىندىسىندا قوعام بەلسەندىلەرى جاستارعا الەۋمەتتىك جوبالاردى جۇزەگە اسىرۋعا قولداۋ كورسەتەتىنىن اتاپ ءوتىپ، قاتىسۋشىلار ءوز يدەيالارىن ورتاعا سالدى. ۇيىمداستىرۋشىلار مۇنداي پراكتيكۋمداردى ءداستۇرلى تۇردە وتكىزۋدى جوسپارلاپ وتىرعانىن جەتكىزدى.