تۇركىستاندا جاڭا سپورت كەشەنى اشىلدى

تۇركىستاندا «وليمپيادا ورتالىعى» زاماناۋي سپورت كەشەنى اشىلدى

اشىق باسسەينى بار سپورت كەشەنىندە تەك قانا بالالار مەن جاسوسپىرىمدەر ۇيىرمەلەرى جۇمىس ىستەپ قانا قويماي، وليمپيادالىق سپورت تۇرلەرى بويىنشا ۇلتتىق قۇراما كوماندالار وقۋ-جاتتىعۋ جيىنىن وتكىزە الاتىن مۇمكىندىگى بار، دەپ حابارلايدى Almaty-akshamy.kz

 تۇركىستان وبلىسىنىڭ اكىمى ءومىرزاق شوكەيەۆ جانە ۇلتتىق وليمپيادالىق كوميتەتتىڭ ۆيسە-پرەزيدەنتى دانيار ابۋلعازين سپورت كەشەنىن رەسمي اشتى.

«وبلىسىمىزدا تاۋەلسىزدىگىمىزدىڭ 30 جىلدىعىن مەرەكەلەۋگە دايىندىق باستالىپ كەتتى. سول مەرەكە قارساڭىندا تۇركىستان قالاسىندا كوپتەگەن الەۋمەتتىك نىساندار ىسكە قوسىلىپ جاتىر. وزدەرىڭىز بىلەسىزدەر، ەلباسى نۇرسۇلتان نازاربايەۆتىڭ تاپسىرماسىمەن تۇركىستان قالاسىن قايتا جاڭعىرتۋ، جاڭارتۋ جۇمىستارى ءجۇرىپ جاتىر. 2،5 جىلدىڭ ىشىندە 400-دە استام نىسان سالىندى. جاڭا اكىمشىلىك-ىسكەرلىك ورتالىق، تاريحي، مادەني، تۋريسىك ورتالىقتار بوي كوتەردى. تۇركىستاننىڭ جاڭا كەلبەتى قالىپتاسىپ كەلە جاتىر. مىنە، وسى دامۋ جوسپارى اياسىندا بۇگىن وتە كەرەمەت سپورت كەشەنىن اشقالى تۇرمىز. بۇل نىساندى بەلگىلى كاسىپكەر دانيار ابۋلعازين ءوز قاراجاتىنا سالىپ، تۇركىستانعا تارتۋ ەتىپ وتىر. وزدەرىڭىز كورىپ وتىرسىزدار، مۇندا سپورتتى دامىتۋعا بارلىق جاعداي جاسالعان. سپورتتىڭ تۇر-تۇرىمەن جىلدىڭ 4 مەزگىلىندە دە ۇزدىكسىز اينالىسۋعا بولادى. كوماندالىق ويىن تۇرلەرى زالى، 50 مەترلىك باسسەينى، مەديسينالىق ورتالىعى وتە جاقسى جوبامەن سالىنعان. بۇل كەشەن ءبىزدىڭ جاسوسپىرىمدەر، جاستار ءۇشىن وتە كەرەمەت سىيلىق بولدى. مىنەكي، ارامىزدا كۇنى كەشە عانا الەم چەمپيونى اتانعان ساكەن بيبوسىنوۆ باۋىرىمىز كەلىپ وتىر. وڭىرىمىزدەن ساكەن سياقتى چەمپيوندار شىعا بەرسىن!»، - دەدى ءومىرزاق شوكەيەۆ.