تۇركىستان وبلىسىندا رەسپۋبليكالىق اقىندار ايتىسى ءوتتى

جىر دوداسى ەل تاۋەلسىزدىگىنىڭ 30 جىلدىعىنا وراي ۇيىمداستىرىلدى.

تۇركىستان وبلىسى، سايرام اۋدانىندا «ماڭگىلىك ەل جىرلايدى» رەسپۋبليكالىق اقىندار ايتىسى ءوتتى، دەپ حابارلايدى Almaty-akshamy.kz

ۇلتتىڭ ۇلى تۇلعالارى – جامبىل جابايەۆ، ءاليحان بوكەيحانوۆ، كۇش اتاسى قاجىمۇقان، سونداي-اق دينا نۇرپەيىسوۆا، ىبىراي ءالتىنساريننىڭ مەرەيلى جىلدارىن جىرعا قوسقان اقىندار ايتىستى ساعىنعان كورەرمەنىن ءبىر سەرپىلتتى.

تاۋەلسىزدىكتىڭ قادىر-قاسيەتىن ۇلىقتاپ، ەل مەرەيىن ۇستەم ەتتى. تاڭەرتەڭنەن باستالعان رەترو ايتىستا 4 جۇپ ونەر كورسەتىپ، الاماننىڭ قورىتىندىسىندا باس جۇلدەنى تۇركىستاننىڭ تارلانى بەكارىس شويبەكوۆ يەلەندى. ءبىرىنشى ورىن سەرىك قالييەۆكە بۇيىرسا، ەكىنشى ورىندى انار جاپپارقۇلوۆا جەڭىپ الدى. ال ءۇشىنشى ورىندى ايبەك قالييەۆ مىسە تۇتتى.

ايتىستىڭ ارنايى جۇلدەلەرى كاريما ورالوۆا، اقمارال لەۋبايەۆا، مارجان ەسجانوۆا، ءبورىباي ورازىمبەتكە بەرىلدى. قازىلار القاسىنىڭ ءتوراعاسى، جازۋشى، «الاش» سىيلىعىنىڭ يەگەرى مارحابات بايعۇت جۇرەگىنەن جىر توگىپ، حالقىن قۋانتقان اقىندارعا شىنايى العىسىن ءبىلدىردى.