تۇركىمەنستان پرەزيدەنتىنىڭ اناسىنا جاڭا اتاق بەرىلدى

ول ەڭبەك سىڭىرگەن كىلەمشى بولدى.

تۇركىمەنستان پارلامەنتى ەل پرەزيدەنتى سەردار بەردىمۇحامەدوۆتىڭ اناسى وگۋلگەرەك بەردىمۇحامەدوۆاعا تۇركىمەنستاننىڭ ەڭبەك سىڭىرگەن كىلەمشىسى قۇرمەتتى اتاعىن بەردى، دەپ حابارلايدى Almaty-akshamy.kz Interfax.ru سىلتەمە جاساپ.

پرەزيدەنت اناسىنا قۇرمەتتى اتاق بەرۋ شەشىمى «بەيتاراپ تۇركىمەنستان» ۇكىمەتتىك گازەت بەتتەرىندە جاريالاندى.

بۇل اتاق وعان «تۇركىمەنكىلەم» مەملەكەتتىك بىرلەستىگىنىڭ ءوتىنىشى نەگىزىندە مەملەكەت تاپسىرىسى بويىنشا «تۇركىمەنستاننىڭ تاۋەلسىزدىگى مەن ەگەمەندىگىن نىعايتۋداعى، ۇلتتىق كىلەم توقۋ ونەرىن دامىتۋداعى، كىلەمدەردى تاماشا ورنەكتەرمەن بەزەندىرۋدەگى جانە كوپ جىلعى قاجىرلى دا ادال ەڭبەگى، كاسىبي شەبەرلىگى ءۇشىن» سىڭىرگەن ەڭبەگى ءۇشىن بەرىلگەن.

جارلىقتا "بەردىمۇحامەدوۆا - تۇركىمەنستاننىڭ كىلەم توقۋ ونەرىن دامىتۋعا، جەتىلدىرۋگە، كەلەشەك ۇرپاققا جەتكىزۋگە، كيەلى وتانىمىزدىڭ داڭقتى دامۋىن بۇكىل الەمگە دارىپتەۋگە لايىقتى ۇلەس قوسقان بىلىكتى كىلەمشىلەردىڭ ءبىرى"، - دەلىنگەن.

گازەتتىڭ سول نومىرىندە تاعى ون ءبىر كىلەمشىگە ءدال وسىنداي قۇرمەتتى اتاق بەرۋ تۋرالى پرەزيدەنت جارلىعى جاريالانعان بولاتىن.

«تۇركىمەنستاننىڭ ەڭبەك سىڭىرگەن كىلەمشىسى» قۇرمەتتى اتاعى 1991 جىلدان بەرى مامىر ايىنىڭ سوڭعى جەكسەنبىسىندە تويلانىپ كەلە جاتقان تۇركىمەن كىلەمى مەرەكەسى قارساڭىندا بەرىلىپ وتىر.