ءبىر جىل ىشىندە جەر سىلكىنگەن 11 وبلىستا 650 مىڭ ءۇي سالىنادى.
تۇركيا ۇكىمەتى مۇشەلەرى مەن پارتيا جەتەكشىلەرى باس قوسقان قاحرامانماراش قالاسىنداعى جيىندا رەجەپ تايىپ ەردوعان تىكەلەي ەفيردە جاڭا ۇيلەردىڭ ىرگەتاسىن قۇيۋ پروسەسىن باستاتتى، دەپ حابارلايدى Almaty-akshamy.kz Qazaqstan.tv-عا سىلتەمە جاساپ.
ونىڭ 30 مىڭنان استامى اۋىلداردا بوي كوتەرمەك. ۇيلەردىڭ بيىكتىگى 4-5 قاباتتان اسپايدى جانە تاستاق جەرلەرگە سالىنادى. تۇركيانىڭ وڭتۇستىك-شىعىسىندا ءبىر جارىم اي بۇرىن بولعان الاپات جەر سىلكىنىسىنەن 50 مىڭنان اسا ادام قايتىس بولىپ، 500 مىڭنان اسا عيمارات قيراعان نەمەسە بۇلىنگەن. ەكونوميستەر بۇل اپاتتان تۇركيا ەكونوميكاسىنا 100 ملرد دوللاردان اسا شىعىن كەلگەنىن ايتادى.
«اپات ايماعىندا ۇيىندىلەردى تازالاۋ، ۋاقىتشا باسپانا تۇرعىزۋ جانە جاڭا ۇيلەر سالۋ سياقتى جۇمىستاردى ءبىر مەزگىلدە جۇرگىزىپ جاتىرمىز. بۇگىنگە دەيىن قيراندىلاردىڭ جارتىسىنان كوبىن تازالادىق. وڭىردە 525 مىڭ شاتىر، 32 مىڭ كونتەينەر ورناتتىق. مامىر ايىنا دەيىن 100 مىڭ كونتەينەر ءۇي ورناتۋ جوسپاردا»، - دەيدى تۇركيا پرەزيدەنتى رەجەپ تايىپ ەردوعان.