ۇيىندىلەر استىنان سەگىز مىڭنان استام ادام قۇتقارىلعان
تۇركيا پرەزيدەنتى رەجەپ تايىپ ەردوعان جويقىن ءزىلزالادان زارداپ شەككەن 10 پروۆينسيادا 3 ايعا توتەنشە جاعداي رەجيمىن ەنگىزگەنىن جاريالادى، دەپ حابارلايدى Almaty-akshamy.kz قازاقپارات اگەنتتىگىنە سىلتەمە جاساپ.
تۇركيا باسشىسى، سوڭعى مالىمەت بويىنشا، 3 549 ادامنىڭ جەر سىلكىنىسىنىڭ قۇربانى بولعانىن، 22 168 ادامنىڭ جاراقات العانىن ايتتى. ۇيىندىلەر استىنان سەگىز مىڭنان استام ادام قۇتقارىلعان.
«ءبىز تۇركيا تاريحىنداعى عانا ەمەس، تۇتاس ايماق پەن الەمدەگى ەڭ ۇلكەن اپاتتاردىڭ بىرىنە تاپ بولدىق. اپات ايماعىندا جۇمىس ىستەۋ ءۇشىن بارلىق مەملەكەتتىك قۇرىلىمدار، قىزمەتكەرلەر مەن تەحنيكالار جۇمىلدىرىلدى. ءبىرىنشى كەزەڭدە اپات ايماعىنىڭ تۇرعىندارىنا شۇعىل كومەك كورسەتۋگە 100 ملرد ليرا ءبولىندى»، - دەدى ر. ەردوعان.
ءزىلزالا ايماعىنا 54 مىڭ شاتىر، 102 مىڭ كەرەۋەت، باستاپقى قاجەتتى زاتتار، 1000-عا جۋىق جەدەل جاردەم ۆاگوندارى، ەكى سانيتارلىق ۇشاق جىبەرىلدى. ون پروۆينسيانىڭ تۇرعىندارىنا 5 مىڭ مەديسينالىق قىزمەتكەر كومەكتەسىپ جاتىر.
ەردوعاننىڭ ايتۋىنشا، اپات ايماعىندا 53 317 قۇتقارۋشى جۇمىلدىرىلدى. ولاردىڭ سانى تۇركيا مەن باسقا ەلدەردىڭ كوماندالارىنىڭ ارقاسىندا كۇن ساناپ ارتىپ كەلەدى. سونداي-اق، تۇركيا پرەزيدەنتى الاپات جەر سىلكىنىسىنىڭ سالدارىن جويۋدا ىنتىماقتاستىققا شاقىردى.
«ءبىز جالعان اقپارات پەن فەيك ارقىلى قوعامعا الاۋىزدىق تاراتۋ ارەكەتتەرىن كورىپ وتىرمىز. بارلىعى ءۇشىن ۋاقىتى كەلگەندە جاۋاپ الامىز»، - دەدى ر. ەردوعان.
سونىمەن بىرگە، پرەزيدەنت تۇركيا ۇكىمەتى جانىنداعى توتەنشە جاعداي سالدارىن بولدىرماۋ جانە جويۋ باسقارماسىنىڭ (AFAD) بانكتىك شوتتارىنا تۇرىك ليرالارى مەن شەتەل ۆاليۋتاسىنداعى قاراجات اۋدارىلعانى ءۇشىن كوميسسيا الىنىپ تاستالعانىن ايتتى.