قازاقستان تجم قۇتقارۋشىلارىنىڭ كۇشتەرى 7 ادامدى قۇتقاردى
تۇركيانىڭ نۋرداگى قالاسىنداعى جويقىن جەر سىلكىنىسىنىڭ سالدارىن جويۋعا جۇمىلدىرىلعان قازاقستاندىق قۇتقارۋشىلاردىڭ ەكىنشى ەشەلونى ەلگە امان-ەسەن ورالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ق ر تجم قۇتقارۋشىلارى مەن اپاتتار مەديسيناسى ورتالىعىنىڭ دارىگەرلەرى بار بورت استانا اۋەجايىنا قوندى. ولاردى قازاقستاندىقتار، تۋىستارى، دوستارى مەن ارىپتەستەرى كۇتىپ الدى. تج ءمينيسترى يۋريي يلين مەن تۇركيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ۋفۋك ەكيدجي (Ufuk Ekici) دا قۇتقارۋشىلاردىڭ الدىنان شىعىپ، ولاردىڭ ءارقايسىسىنا اتقارعان قيىن جۇمىسى ءۇشىن العىستارىن ءبىلدىردى. سونداي-اق ولاردىڭ ىس-ارەكەتتەرىن كاسىبي، ەرجۇرەك جانە ناتيجەلى دەپ باعالادى.
مەملەكەت باسشىسىنىڭ تاپسىرماسى بويىنشا 7 اقپاندا قۇتقارۋ بولىمشەلەرىنىڭ كۇشتەرى مەن قۇرالدارى، ونىڭ ىشىندە قازاقستان تجم تەحنيكاسى، اپاتتار مەديسيناسى ورتالىعىنىڭ دارىگەرلەرى جانە كينولوگيالىق ەسەپتوپتار العاشقىلاردىڭ ءبىرى بولىپ ەكى ەشەلونمەن جولعا شىعىپ، ەڭ كۇردەلى قيراعان وبەكتىلەردە ىزدەستىرۋ-قۇتقارۋ جۇمىستارىن جۇرگىزۋگە كىرىسكەن بولاتىن. قازاقستاندىق قۇتقارۋشىلار توبىن تج ءبىرىنشى ۆيسە-مينيسترى يبراگيم كۇلشىمبايەۆ باسقاردى.
ەستەرىڭىزگە سالا كەتەيىك، تۇركيانىڭ ءۇش وڭىرىندە ىزدەستىرۋ-قۇتقارۋ جۇمىستارىن جۇرگىزۋ باستالعاننان بەرى قازاقستان تجم قۇتقارۋشىلارىنىڭ كۇشتەرى 7 ادامدى قۇتقاردى. قازا تاپقان 88 ادامنىڭ، ونىڭ ىشىندە 10 بالانىڭ دەنەسى شىعارىلدى.