جەر سىلكىنىسى بولعان ايماقتاعى 1 ميلليون 116 مىڭ تۇرعىن باسقا قالالاردى پانالاعان
قازىرگى تاڭدا 205 مىڭ 454 ادام ەل استاناسى انكاراعا، 154 مىڭ 86 ادام انتالياعا كەلگەن. ءتىپتى جەر سىلكىنىسى سەزىلگەن مەرسين قالاسىن 65 مىڭ، ال ەلازىعتى 50 مىڭ ادام پانالاعان، دەپ حابارلايدى Almaty-akshamy.kz inbusiness.kz-كە سىلتەمە جاساپ.
تۇركيانىڭ 11 قالاسىن قامتىعان 7،7 جانە 7،6 بالدىق جەر سىلكىنىسىنەن كەيىن تۇرعىندار اۋە، قۇرلىق جانە تەڭىز جولدارى ارقىلى باسقا قالالارعا كەتتى. ولار سونداعى قوناقۇيلەرگە، جاستار جانە سپورت مينيسترلىگىنە قاراستى جاتاقحانالارعا، سونداي-اق ەسىگىن اشقان ەرىكتى وتباسىلارىنا جايعاستى.
جەر سىلكىنىسىنەن امان قالعان 1 ميلليون 116 مىڭ 40 تۇرعىن باسقا قالالارعا ەۆاكۋاسيالاندى. ءتيىستى مەكەمەلەر مەن ۇيىمدار ولاردى ازىق-تۇلىك جانە كيىم-كەشەكپەن قامتاماسىز ەتىپ جاتىر. ال زارداپ شەككەن ەرەسەكتەر مەن بالالارعا پسيحوالەۋمەتتىك قولداۋ كورسەتۋ مۇمكىندىكتەرى دە قاراستىرىلعان.
جەرگىلىكتى اكىمدىكتەردەن الىنعان مالىمەتتەر بويىنشا زارداپ شەككەندەردىڭ كوبىسى انكارا قالاسىن پانالاعان. جەر سىلكىنىسى ايماعىنان استاناعا كەلگەندەردىڭ 200 مىڭنان استامى اكىمدىكتىڭ ۇيىمداستىرۋىمەن قوناقۇيلەرگە، دەمالىس ورىندارىنا، جاستار ورتالىقتارىنا، جاتاقحانالارعا، جانە ۇيلەرگە ورنالاستىرىلدى. ال 154 مىڭنان استامى انتاليانى تاڭداعان. قالاداعى قوناقۇيلەردە، پاتەرلەردە جانە جاتاقحانالاردا 73 مىڭداي زارداپ شەگۋشى ورنالاسقان. 12 مىڭى جاتاقحانادا، 4 مىڭى قوناق ۇيلەردە. 64 مىڭنان استامى ءوز قاراجاتىمەن جالعا العان نەمەسە تانىستارىنىڭ ۇيىندە تۇرىپ جاتىر.
جەر سىلكىنىسىنىڭ اسەرى سەزىلگەن قالالاردىڭ ءبىرى - مەرسين. سوعان قاراماستان بۇل شاھارعا العاشقى كۇننەن باستاپ اپات ايماعىنان مىڭداعان ادام كەلگەن. ءقازىر 65 مىڭ 496 ادامنىڭ باسپانا جانە باسقا دا قاجەتتىلىكتەرى اكىمدىكتەر تاراپىنان قامتاماسىز ەتىلدى. ءزىلزالادان زارداپ شەككەن ەلازىع قالاسى دا كەلۋشىلەرگە ەسىگىن ايقارا اشتى. قالاعا مالاتيا، ادىيامان جانە قاحرامانماراشتان كەلگەن 50 مىڭ جەر سىلكىنىسى قۇربانى جاتاقحانالاردى، قوناق ۇيلەردى جانە تۋىستارىنىڭ باسپاناسىندا تۇرىپ جاتىر. سونىمەن قاتار اپاتتان زارداپ شەككەندەر بۇدان باسقا كونيا، قايسەرى، بۋرسا سەكىلدى بىرنەشە قالانى پانالاۋدا.
ادىيامان قالاسىنا بارىپ، شاتىردا تۇرىپ جاتقان تۇرعىندارمەن كەزدەسكەن ەردوعان حالىقتى قالالارىن تاستاپ كەتپەۋگە شاقىردى:
"باسقا شاھارلارعا كەتىپ جاتقان ازاماتتارعا ايتارىم: ءوز قالاڭىزعا يە بولىڭىز، مەكەنىڭىزدى تاستاپ كەتپەڭىز. سىزدەرگە جاڭا قالا تۇرعىزىپ بەرەمىز. قيراعان ءار ءۇيدى جاڭادان سالامىز. بۇلىنگەن زاۋىت پەن كاسىپورىندى قالپىنا كەلتىرەمىز. ءاربىر قالاعا بۇدان دا قارقىندى ەكونوميكا، تۋريزم، جانە بەلسەندى الەۋمەتتىك ءومىر سىيلايمىز. ءبىز جارقىن بولاشاقتى ورناتۋعا بەل بۋدىق. مەن سىزدەردەن ءبىر جىل سۇرايمىن"، - دەدى پرەزيدەنت.