اپاتتان زارداپ شەككەن تۇركياعا كۇللى الەمنەن قۇتقارۋشىلار مەن دارىگەرلەردەن بولەك، ەرىكتىلەر، كاسىپكەرلەر جانە باسقا دا قايىرىمدى جاندار كومەككە ۇمتىلدى.
ءزىلزالا بولعان ايماققا قانداي دا ءبىر پايدام تيەر دەگەن ۇمىتپەن تالاي ادام ءقاۋىپتى بولسا دا، وسى وڭىرگە كەلىپ جاتتى. قازاقستاندىقتاردىڭ دا وسى اپاتتىڭ زارداپتارىن جويۋعا قوسقان ۇلەستەرى وراسان، دەپ حابارلايدى Almaty-akshamy.kz.
جەر سىلكىنگەن ايماققا ەرىكتى بولىپ كەلگەن جاستاردىڭ ءبىرى - ومار، ول - ستامبۋل قالاسىندا وقيتىن ستۋدەنت. ول قازاقستاندىق قۇتقارۋشىلارعا اۋدارماشى بولىپ، ءۇيىندى استىندا قالعان ادامداردى شىعارۋعا از دا بولسا سەپتىگىم تيسە دەگەن ۇمىتپەن كەلگەن.
«قۇتقارۋشىلارعا قانداي كومەك قولىن سوزا الامىن دەگەن وي بولدى. مەن تۇرىك ءتىلىن بىلگەندىكتەن، تۇرىك ءتىلىن بىلمەيتىن قۇتقارۋشىلارعااۋدارماشى رەتىندە كومەكتەسۋگە كەلدىم. ىستىق تاماقتارى بولسىن، ءشايلارى بولسىن، ءبىز قۇتقارۋشىلارعا قولىمىزدان كەلگەنشە كومەكتەسۋگە كەلدىك. ەشقانداي قيىندىق بولعان جوق»، - دەيدى ەرىكتى ومار ايقوجا.
قازاقستاندىق قۇتقارۋشىلار گازيانتەپ پەن نۇرداعى قالالارىندا 10 كۇن بويى كۇندىز-تۇنى جۇمىس ىستەدى. ولاردىڭ جاتىن ورىندارى مەن تاماعىن دايىنداپ، اپات ورنىنا ارنايى كولىكتەرمەن بارىپ-كەلۋىن قامتاماسىز ەتكەن تۇرىك كاسىپكەرى يسكەندەر وسى ارقىلى كومەككە كەلگەن باۋىرلارعا ريزاشىلىعىن بىلدىرگىسى كەلگەنىن ايتادى.
«مەن ءۇشىن قازاقستاننىڭ ورنى ەرەكشە. سەبەبى دوس ەلدەر كوپ، ال قازاقستان - ءبىزدىڭ باۋىرىمىز. قازاقستاننىڭ بارلىق قالالارىنداعى باۋىرلارىمىزعا ءوزىمنىڭ اتىنان، ەلدىڭ اتىنان ەرەكشە العىسىمدى بىلدىرەمىن. قيىن كۇندەردە جانىمىزدان تابىلدى، بىزگە ۇلكەن قولداۋ كورسەتتى. سول ءۇشىن ەلشىلىككە، قۇتقارۋشىلارعا، بارلىق قازاقستاندىقتارعا راحمەت»! - دەيدى كاسىپكەر يسكەندەر كاپلان.
اپات بولعان ايماقتا ءبىرىنشى كۇننەن باستاپ قازاقستاننىڭ تۇركياداعى ەلشىلىگى ءبىزدىڭ ازاماتتاردى ەۆاكۋاسيالاۋدان باستاپ، قۇتقارۋشىلار قىزمەتىن ۇيلەستىرۋگە دەيىنگى جۇمىستاردى رەتتەپ وتىردى.
«ءبىز ديپلومات بولعاندىقتان، وسى قۇتقارۋ ايماعىندا 7/24 ساعات بويى تابىلدىق. العاشقى كۇننەن باستاپ. گازيانتەپ قالاسىنا كەلگەن تۇڭعىش شەتەلدىك ميسسيا بولدىق. ەلشىمىزدىڭ ءوزى باستاپ كەلگەن ديپلوماتتار توبى بولدى. گازيانتەپ قالاسىنداعى جەرگىلكتى بيلىكپەن ءتيىمدى ىس-ارەكەتتەر قۇرىپ، ءبىزدىڭ قۇتقارۋشىلاردىڭ جۇمىستارىن ۋاقتىلى جانە ساپالى اتقارۋلارى ءۇشىن كەرەكتى جاعدايلار جاسالدى»، - دەيدى قازاقستان رەسپۋبليكاسىنىڭ تۇركياداعى ەلشىلىگىنىڭ كەڭەسشىسى نۇريددين امانقۇل.
"اعايىننىڭ ءقادىرىن ءىس تۇسكەندە بىلەرسىڭ" دەگەن ناقىل ءدال ءقازىر تۇركيا حالقى ءۇشىن وتە وزەكتى. قيىن جاعدايدا قالعان ەلگە قول ۇشىن سوزعان ءار ازاماتقا تۇركيالىقتاردىڭ ريزالىعى شەكسىز.