اقىننىڭ ۇستانىمى كۇللى تۇركى ءۇشىن ورتاق
كۇنى ەرتەڭ قازاقستاننىڭ ەڭبەك ەرى مۇحتار شاحانوۆ 80 جاسقا تولادى. ايتۋلى كۇنگە وراي حالىقارالىق تۇركسوي ۇيىمى مەن مادەنيەت جانە سپورت مينيسترلىگىنىڭ ۇيىتقىسىمەن انكارادا حالىقارالىق كونفەرەنسيا ءوتتى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
مۇحتار شاحانوۆتىڭ 80 جاسىن تويلاۋ تۇركيادان باستاۋ الدى. كەلەلى جيىن حالىقارالىق تۇركسوي ۇيىمىنىڭ شتاب-پاتەرىندە ۇيىمداستىرىلدى. اقىننىڭ قاتىسۋىمەن وتكەن شارادا ءتۇبى ءبىر تۇركى جۇرتىنىڭ ەلشىلەرى تۇگەل بوي كورسەتىپ، قوعام قايراتكەرلەرى مەن كورنەكتى وكىلدەرى جينالدى. حالىقارالىق كونفەرەنسيادا شاحانوۆتىڭ ادەبيەت پەن قوعام ومىرىنە سىڭىرگەن ەڭبەگى كەڭىنەن تالقىلاندى.
«مۇحتار شاحانوۆ – تۇركى دۇنيەسىنە ورتاق اقىن. ول تەك قازاق ەلىنىڭ ەمەس، تۇركى جۇرتىنىڭ رۋحاني تۇلعاسى. مۇحتار اعاي ايتتى، مەنىڭ ءبىرىنشى مەرەكەمدى تۇركسوي-دان باستايمىن دەدى. بۇگىن ءبىز مەرەيتويلىق شارالاردىڭ تۇساۋىن كەسىپ وتىرمىز. الداعى ۋاقىتتا قىرعىزستاندا، تۇركى مەملەكەتتەرىندە بولادى. قازاقستاندا وتەدى. مۇحتار شاحانوۆ – قازاق پەن قىرعىزدىڭ ەمەس، بۇكىل تۇركىنىڭ رۋحى، قاينار بۇلاعى»،- دەيدى تۇركسوي ۇيىمىنىڭ باس حاتشىسى سۇلتانبەك رايەۆ.
انادولى جۇرتى مۇحتار شاحانوۆتى ماعجان جۇمابايەۆقا تەڭەيدى. اقىننىڭ ۇستانىمى كۇللى تۇركى ءۇشىن ورتاق، – دەيدى تۇركيا پرەزيدەنتىنىڭ باس كەڭەسشىسى.
«مۇحتار شاحانوۆ قازاقتىڭ زيالىسى. شىعارمالارىنىڭ مازمۇنى مىقتى. قازاقتان شىققان زيالى، بۇكىل تۇركى حالىقتارى ءۇشىن قۇندى. ونىڭ پىكىرلەرى تۇركى الەمى ءۇشىن ماڭىزدى. ءتىپتى بۇتكىل ادامزات ءۇشىن»،-دەيدى تۇركيا پرەزيدەنتىنىڭ باس كەڭەسشىسى يالچىن توپچۋ.
تۇركى جۇرتى ءۇشىن مۇحتار شاحانوۆ پەن شىڭعىس ايتماتوۆ – ەگىز ۇعىم. سوندىقتان قىرعىز حالقىنىڭ اقىنعا دەگەن ىقىلاسى ەرەكشە.