تۇركيادا مۇحتار اۋەزوۆكە ارنالعان حالىقارالىق كونفەرەنسيا ءوتتى

 تۇركيانىڭ انكارا قالاسىندا «قازاق ۇلتىنىڭ اعارتۋشىسى: مۇحتار اۋەزوۆ» اتتى حالىقارالىق كونفەرەنسيا ءوتتى.

شارا حالقىمىزدىڭ ۇلى جازۋشىسى، عۇلاما عالىم مۇحتار اۋەزوۆتىڭ 125 جىلدىق مەرەيتويىنا وراي ۇيىمداستىرىلدى. وعان تۇركيانىڭ بەلگىلى اقىن-جازۋشىلارى مەن عالىمدارى جانە قوعام قايراتكەرلەرى قاتىستى، دەپ حابارلايدى Almaty-akshamy.kz

جازۋشىنىڭ ەڭبەكتەرىن جەرگىلىكتى وقىرمانعا جاقىنىراق تانىستىرۋ ءۇشىن تۇگەلدەي تۇرىك تىلىنە اۋدارۋ ماسەلەسى قاراستىرىلىپ جاتىر. شارا باراسىندا زەينوللا قابدولوۆتىڭ «مەنىڭ اۋەزوۆىم» كىتابىنىڭ تۇرىكشە نۇسقاسى تانىستىرىلدى.

 «ءبىز مۇحتار اۋەزوۆتىڭ تەك قازاقستاندا نەمەسە قىرعىزستاندا ەمەس بۇكىل الەمدە تانىپ بىلسە دەپ قالايمىز. جاستار ونىڭ شىعارمالارىنان ادامگەرشىلىك پەن مادەنيەتتى ۇيرەنسە ەكەن دەيمىز. ونىڭ ۇستىنە بيىل قازاقستان مەن تۇركيا اراسىنداعى ديپلوماتيالىق قارىم-قاتىناستىڭ ورناعانىنا 30 تولدى. وسى ورايدا ەكى ەل اراسىندا ديپلوماتيالىق قانا ەمەس مادەني بايلانىستارىمىز دا كەڭەيىپ، نىعايا تۇسسە دەپ تىلەيمىن»، - دەيدى تۇركسوي حالىقارالىق ۇيىمى ءتوراعاسىنىڭ ورىنباسارى ءبيلال چاكىجى. 

 «بۇل كىتاپتى تۇركسويدىڭ جوباسى رەتىندە قىستان بەرى مەن اۋداردىم. ءوزىم ابايدىڭ، مۇحتاردىڭ اۋىلىندا، جايلاۋىندا تۋىپ-وسكەن قىز بولعاندىقتان، بۇل باقىتتىڭ ماعان بۇيىرعانىنا وتە قۋانىشتىمىن. اۋدارۋ وڭاي دەپ ايتا المايمىن. ءبىراق سوندا دا قۋانىشتىمىن وسى ءىستىڭ باسى-قاسىندا بولعانىم ءۇشىن»، - دەيدى "مەنىڭ اۋەزوۆىم" كىتابىنىڭ اۋدارماشىسى اسەم ەرەجەپ قىزى.