تۇركيادا تاعى دا جويقىن جەر سىلكىنىسى بولۋى مۇمكىن.
سول ەلدىڭ بەلگىلى سەيسمولوگى نادجي گوريۋر وسىلاي دەيدى، دەپ حابارلايدى Almaty-akshamy.kz 24.kz-كە سىلتەمە جاساپ.
ايتۋىنشا، ءقاۋىپ ىستامبۇلعا ءتونىپ تۇر. ەگەر جەر سىلىكىنسە 100 مىڭنان اسا عيمارات قۇلاۋى ىقتيمال. جەرگىلىكتى جانە شەتەلدىك سەيسمولوگتاردىڭ ىستامبۇلدى ۇلكەن جەر سىلكىنىسى كۇتىپ تۇر دەگەن بولجامدارى ءجيى ايتىلا باستادى. تۇرىك سەيسمولوگى نادجي گەروردىڭ سوزىنشە، ءزىلزالانىڭ 7 بالدان جوعارى بولۋ ىقتيمالدىعى 60%-تەن جوعارى. ال، مەگاپوليس مۋنيسيپاليتەتى باسشىسىنىڭ ورىنباسارى دوكتور بۋگرا گوكچە مارمارا ايماعىنداعى ەڭ جوعارعى قاۋىپتەگى سەنارييدى بىلايشا ءتۇسىندىردى.
بۋگرا گوكچە، ىستامبۇل مۋنيسيپاليتەتى باسشىسىنىڭ ورىنباسارى: - ەڭ ناشار سەناريي بويىنشا ىستامبۋلداعى مارمارا جەر سىلكىنىسىندە 207 مىڭ عيمارات زاقىمدانۋى مۇمكىن. بۇل جاعداي قالامىزدىڭ شامامەن 3 ميلليون تۇرعىنىنا تىكەلەي اسەر ەتەدى. ءبىز جەر سىلكىنىسىنە ءتوزىمدى ترانسفورماسيا جوسپارىن توپىراق پەن قۇرىلىس قورى جاعىنان ەڭ ءقاۋىپتى ايماقتاردان باستايمىز.
ىستامبۇلدى كۇشتى جەر سىلكىنىسىنە دايىنداۋ قاجەتتىلىگىن تۇركيا بيلىگى وسى جىلدىڭ اقپان ايىندا ەلدىڭ وڭتۇستىك-شىعىسىندا بولعان زاردابى كوپ ءزىلزالادان كەيىن قولعا العان. اتاپ ايتقاندا، قاۋىپتىلىك دەڭگەيىنە قاراي عيماراتتار سۇرىپتالىپ، رەزەرۆتىك الاڭدار ناقتىلاندى. بۇزىلۋى مۇمكىن ۇيلەر انىقتالىپ، ءبىرقاتار نىسانداردىڭ قاڭقالارىن قاتايتۋ جۇمىستارى قارقىن الىندى. سونداي-اق ءبىرىنشى كەزەڭدە 300-350 مىڭ شارشى مەتر تۇرعىن ءۇي سالۋ جوسپارلانعان.
مەحمەت وزحاسەكي، قورشاعان ورتا، ۋربانيزاسيا جانە كليماتتىق وزگەرىس ءمينيسترى: - ىستامبۇلدا 5،8 ميلليون تاۋەلسىز مۇلىك بار. ونىڭ 1،5 ميلليونى وتە ءقاۋىپتى ساناتتا، سونىڭ 600 مىڭى ءبىرىنشى كەزەكتە بۇزىلاتىن ۇيلەر. شىنىمدى ايتسام، بۇل ۇلكەن سان. 600 مىڭ ءۇيدىڭ ماسەلەسىن شۇعىل باستاۋىمىز قاجەت.
ايتىپ كەلمەيتىن اپاتقا دايىندىقتى شۇعىل باستاۋ ءۇشىن ارنايى زاڭ جوباسى ازىرلەندى. ءتيىستى قۇجات پارلامەنتتىك كۇزگى ماجىلىسىندە تالقىلانباق. زاڭ جوباسى بيۋروكراتيالىق ۇردىستەردى جەڭىلدەتۋ جانە مامىلە كەلە الماعان تۇرعىنداردىڭ جاعدايىن قاراستىرماق.
مەحمەت وزحاسەكي، قورشاعان ورتا، ۋربانيزاسيا جانە كليماتتىق وزگەرىس ءمينيسترى: - ءبىزدىڭ مينيسترلىك اياسىندا باستالعان بۇل جۇمىس 10 كۇندە اياقتالادى دەپ ويلايمىن. ءبىز زاڭ جوباسىن ازىرلەپ جاتىرمىز. پارلامەنت اشىلعانعا دەيىن مۇنى اياقتاساق، ءماجىلىستىڭ كەزەكتەن تىس جينالىسىن شاقىرتامىز. وسىلايشا، ىستامبۇلدى جەر سىلكىنىسىنە دايىنداۋ ءۇشىن الدىمىزدا تۇرعان بارلىق كەدەرگىلەردى ەڭسەرەمىز.
مەرۋەرت قاناعات، ءتىلشى: - تاريحى تەرەڭ ىستامبۇل، ەۋروپا تاريحىنداعى العاشقى ميلليونەر-قالا. ريم، ۆيزانتيا جانە وسمان يمپەريالارىنىڭ بۇرىنعى استاناسى. قازىرگى تۇركيانىڭ نەگىزگى ساۋدا، ونەركاسىپ جانە مادەنيەت ورتالىعى، ەلدىڭ باستى پورتتى قالاسى. قانشاما عاسىرلىق قالادا كونە عيماراتتار كوپ. ءبىر جاعىنان ولاردى ساقتاپ قالۋ جانە تابيعاتتىڭ توسىن مىنەزىنە دايىندالۋ وڭاي بولمايتىنى انىق.