تۇركيادا 22 قاڭتار ۇلتتىق ازا تۇتۋ كۇنى بولىپ جاريالاندى.
21 قاڭتار، سەيسەنبىگە قاراعان ءتۇنى تۇركيانىڭ بولۋ پروۆينسياسىنداعى كارتالكايا تاۋ شاڭعىسى كۋرورتىنداعى قوناقۇيدەن ءورت شىقتى، دەپ حابارلايدى aqshamnews.kz.
ءورت 12 قاباتتى (باسقا دەرەكتەر بويىنشا 11 قاباتتى) گراند كارتال قوناقۇيىندە جەرگىلىكتى ۋاقىت بويىنشا 03:27-دە باستالعان. ءقازىر تۇركياداعى جالپىۇلتتىق ەكى اپتالىق مەكتەپ دەمالىسى باستالدى جانە شاڭعى ماۋسىمىنىڭ قىزۋىنا بايلانىستى قوناقۇيدە 234 ادام بولعان.
بولۋ گۋبەرناتورى ابدۋلازيز ايدىن الدىن الا مالىمەت بويىنشا، ءورتتىڭ ءقوناقۇيدىڭ ءتورتىنشى قاباتىنداعى مەيرامحانا ايماعىندا باستالىپ، جوعارعى قاباتتارعا تاراعانىن ايتتى. ءقوناقۇي بولۋدىڭ ورتالىعىنان ءبىرشاما قاشىقتىقتا ورنالاسقان. ءورت سوندىرۋشىلەرگە وقيعا ورنىنا جەتۋ ءۇشىن ءبىر ساعاتتان استام ۋاقىت قاجەت بولدى.
قۇتقارۋ جۇمىستارى تاڭەرتەڭگە دەيىن جالعاستى، قۇتقارۋشىلاردىڭ ءقوناقۇيدىڭ كەيبىر بولىكتەرىنە ازەر جەتكەنى حابارلاندى. - قازا تاپقاندار سانى 76-عا جەتتى، - دەپ حابارلادى ىشكى ىستەر ءمينيسترى الي ەرليكايا.
زارداپ شەككەندەردىڭ كەيبىرىنىڭ جاعدايى اۋىر. قايعىلى جاعدايعا بايلانىستى بۇگىن تۇركيادا ۇلتتىق ازا تۇتۋ كۇنى بولىپ جاريالاندى.
رەجەپ تاييپ ەردوعان، تۇركيا پرەزيدەنتى:
- ءورت تۋرالى حابار جەتكەن بويدا وڭىرگە مينيسترلەر مەن كوماندالارىمىزدى جىبەردىك. ءورتتى سوندىرۋگە 156 تەحنيكا مەن جەكە قۇرامنىڭ 428 ادامى جۇمىلدىرىلدى. ءورتتىڭ شىعۋ سەبەبى مەن كىنالىلەردى انىقتاۋ ءۇشىن تەرگەۋ امالدارى باستالدى. 4 ادام ۇستالدى. مۇنداي قايعىلى وقيعاعا سەبەپكەر بولعاندار زاڭ الدىندا جاۋاپ بەرەدى. 22 قاڭتار ۇلتتىق ازا تۇتۋ كۇنى دەپ جاريالاندى. ەلىمىز بەن شەتەلدەگى وكىلدىكتەرىمىزدە تۋىمىز تومەن تۇسىرىلەدى.