تۇركى مەملەكەتتەرىنىڭ ءدىني باسقارما ءتوراعالارى مەن مۇفتيلەرى تۇركىستاندا باس قوسادى

ءىس-شارا بارىسىندا تۇركى مەملەكەتتەرى مۇفتيلەرى قوجا احمەت ياساۋي كەسەنەسىن زيارات ەتىپ، بابالار رۋحىنا 100 قۇران حاتىم دۇعاسىن جاسايدى. 

6 مامىر كۇنى تۇركىستان قالاسىندا تۇركى مەملەكەتتەرىنىڭ «مۇفتيلەر القاسى» ءماجىلىسى مەن «يسلام وركەنيەتىنىڭ دامۋىنا تۇركى حالىقتارىنىڭ قوسقان ۇلەسى» تاقىرىبىندا حالىقارالىق عىلىمي-تاجىريبەلىك كونفەرەنسيا وتەدى، دەپ حابارلايدى Almaty-akshamy.kz Egemen.kz-كە سىلتەمە جاساپ. 

حالىقارالىق كونفەرەنسياعا تۇركى مەملەكەتتەرى ۇيىمىنىڭ باس حاتشىسى باعدات امرەيەۆ،  اقپارات جانە قوعامدىق دامۋ ءمينيسترى اسقار وماروۆ، تۇركىستان وبلىسىنىڭ اكىمى ءومىرزاق شوكەيەۆ، حالىقارالىق تۇركى اكادەمياسىنىڭ پرەزيدەنتى دارحان ءقىدىرالى، تۇركى مەملەكەتتەرى ۇيىمى اقساقالدار كەڭەسىنىڭ مۇشەسى يكرام ادىربەك ۇلى، قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى، تۇركيا رەسپۋبليكاسى ءدىن ىستەرى باسقارماسىنىڭ باسشىسى، باس ءمۇفتي ءالي ەرباش، كاۆكاز مۇسىلماندارى باسقارماسىنىڭ ءتوراعاسى، باس ءمۇفتي اللاشۇكىر پاشا-زادە، قىرعىزستان مۇسىلماندارى ءدىني باسقارماسىنىڭ ءتوراعاسى، باس ءمۇفتي زامير راكييەۆ، وزبەكستان مۇسىلماندارى باسقارماسىنىڭ ءبىرىنشى ورىنباسارى حاميتجان يشماتبەكوۆ، قمدب عۇلامالار كەڭەسىنىڭ، اقساقالدار كەڭەسىنىڭ مۇشەلەرى، عالىمدار مەن وبلىس باس يمامدارى قاتىسادى.

مۇفتيلەر القاسى مەن حالىقارالىق كونفەرەنسيا ماقساتى – تۇركىتىلدەس ەلدەردىڭ ورتاق مۇرالارىن دارىپتەۋ، احمەت ياساۋي بابامىزدىڭ، سونىمەن قاتار تۇركى دۇنيەسىنە ورتاق قورقىت اتا، ياساۋي، ءماۋلانا، ءناۋاۋي، ماناس مۇرالارىن ناسيحاتتاۋ، ماتۋريدي سەنىم مەكتەبى مەن ءابۋ حانيفا ءمازھابىن حالىققا جەتكىزۋ، ءدىني وقۋ-اعارتۋ سالاسى بويىنشا بىرلەسكەن جوبالاردى جۇزەگە اسىرۋ، جاھاندىق سىن-قاتەرگە جاۋاپ بەرۋدە مۇسىلمان ۇمبەتىنىڭ ءوزارا ىنتىماعىن ارتتىرۋ، ءدىني مەرەكەلەردى ءبىر كۇندە اتاپ ءوتۋ، ورتاق ءپاتۋالار قابىلداۋ، دەسترۋكتيۆتى ءدىني اعىمداردىڭ تەرىس ۇگىت-ناسيحات جۇمىستارىنا جول بەرمەۋ.