15 قىركۇيەكتە اقتاۋدا ۇكىمەت باسشىسىنىڭ قاتىسۋىمەن قازاقستان ءتۋريزمىن دامىتۋ فورۋمى ءوتتى.
ءىس-شاراعا شىۇ ەلدەرىنىڭ مينيسترلەرى، حالىقارالىق قوناقۇيلەر، ءىرى قازاقستاندىق جانە شەتەلدىك تۋروپەراتورلار، اۋە كومپانيالار جەلىلەرىنىڭ باسشىلارى، سونداي-اق ينۆەستورلار، حالىقارالىق ساراپشىلار، ديپلوماتيالىق كورپۋس جانە مەملەكەتتىك ورگانداردىڭ وكىلدەرى قاتىستى، - دەپ حابارلايدى Almaty-akshamy.kz.
ق ر پرەمەر-مينيسترى ءاليحان سمايىلوۆ كەز كەلگەن قوناق ءۇشىن بارىنشا قولايلى جاعداي جاساۋعا نيەتتى ەكەنىن ايتتى. مەملەكەتتىڭ دە، جەكە سەكتوردىڭ دا كۇش-جىگەرى وسىعان باعىتتالعان.
"كەيىنگى ءۇش جىلدا سالاعا 4 ميلليارد دوللار كولەمىندە ينۆەستيسيا تارتىلىپ، 400-دەن استام تۋريستىك نىسان سالىندى. رەسپۋبليكادا Hilton، Marriott، Wyndham، Accor جانە ت.ب. سياقتى 20-دان اسا تانىمال حالىقارالىق ءقوناقۇي جەلىلەرى ەسىگىن ايقارا اشتى. ءبىز شەتەلدىك جانە وتاندىق ينۆەستورلاردى قازاقستاننىڭ تۋريزم سالاسىن ەل ۇكىمەتىنىڭ قولداۋىمەن ۇزاق مەرزىمدى ينۆەستيسيا سالۋ مۇمكىندىگى رەتىندە قاراستىرۋعا شاقىرامىز"، - دەيدى ۇكىمەت باسشىسى.
سونىمەن قاتار ۇكىمەت باسشىسى وتاندىق ءتۋريزمنىڭ حالىقارالىق ارەناداعى باسەكەگە قابىلەتتىلىگىن ارتتىرۋ اياسىندا قازاقستاننىڭ شەتەلدەگى ءيميدجىن كوتەرۋ بويىنشا ۆەدومستۆوارالىق ۇيلەستىرۋ جۇمىستارىن كۇشەيتۋ ماڭىزدى ەكەنىن اتاپ ءوتتى. وسىعان بايلانىستى ەلدىڭ تۋريستىك برەندىن ازىرلەپ، حالىقارالىق اقپارات كەڭىستىگىندەگى تانىمال ەتۋ جۇمىستارىن كۇشەيتۋ كەرەكتىگىن ايتتى. سونىمەن قاتار ءاليحان سمايىلوۆ جول بويىنداعى سەرۆيستىك نىسانداردى پايدالانۋ ساپاسى ماسەلەلەرىن شەشىپ، اگروتۋريزمدى دامىتۋ شارالارىن ازىرلەۋ قاجەتتىگىن ايتتى.
"اۋىل تۇرعىندارى، شارۋالار مەن باعباندار ءوز شارۋاشىلىقتارىندا تۋريستەردى قابىلداۋ ارقىلى قوسىمشا تابىس تابا الادى. ول ءۇشىن ءبىز زاڭناماعا ءتيىستى وزگەرىستەر ەنگىزۋىمىز كەرەك. Community based tourism – الەمدىك ترەند، ودان قالىس قالماۋ كەرەك"، - دەدى ءاليحان سمايىلوۆ.
تۋريزم جانە سپورت ءمينيسترى ەرمەك مارجىقپايەۆ بىلتىر جاڭادان قۇرىلعان ۆەدومستۆونىڭ ەكى سالانى تەپە-تەڭ ۇستاپ دامىتاتىنى تۋرالى ايتتى.
"بيىل جارتى جىلدىقتىڭ قورىتىندىسى بويىنشا قازاقستاندا ىشكى تۋريزم 3،2 ميلليون ادامعا جەتسە، سىرتتان كەلەتىن ساياحاتشىلار سانى 500 مىڭنان اسقان. بىلتىر تۋريزم سالاسىنا 350 ميلليارد تەڭگە كولەمىندە ينۆەستيسيا تارتىلدى، بيىل بۇل كورسەتكىشتى 800 ميللياردقا جەتكىزەمىز دەگەن جوسپار بار. پرەزيدەنتىمىز ايتقانداي تۋريزم - ەكونوميكانىڭ ءبىر سالاسى بولادى. بۇگىن تۋر وپەراتورلار، ديپميسسيا وكىلدەرى جانە ءتۇرلى كومپانيا وكىلدەرىمەن باس قوسىپ، حالىقارالىق فورۋمدا ەلدەگى ءتۋريزمنىڭ ماسەلەلەرى، ناتيجەلەرىن تالقىلاپ جاتىرمىز. ينفراقۇرىلىم جاعدايى، ۆيزا ماسەلەسى، ينۆەستيسيا تارتۋ سىندى تاقىرىپتار كوتەرىلىپ جاتىر جانە ءبىز وسى ناتيجەلەر مەن ۇسىنىستار بويىنشا جۇمىس ىستەيتىن بولامىز"، - دەيدى مينيستر.
سونداي-اق، مينيستر التى ايدا ەلىمىزگە 500 مىڭنان اسا شەتەلدىك تۋريست كەلگەنىن ايتتى.
"بۇگىندە 80 ەلدىڭ ازاماتتارىنا ۆيزاسىز كىرۋ مۇمكىندىگى بەرىلدى، وسى كورسەتكىشتى 100-گە جەتكىزۋ كوزدەلىپ وتىر. جىل سوڭىنا دەيىن 1،4 ميلليون شەتەلدىك تۋريست كەلەدى دەگەن ۇمىتتەمىز. بۇل سالادا ماسەلە جوق ەمەس، الايدا جىل سايىن ۇكىمەتتەن 50 ميلليارد تەڭگە ءبولىنىپ جاتىر جانە ينۆەستورلاردى تارتۋ جۇمىستارى قارقىندى. بالالار مەن جاسوسپىرىمدەر ءتۋريزمىن دامىتۋدى دا قولعا الىپ وتىرمىز. بالالار لاگەرلەرىن سالۋ جانە ونى جۇرگىزۋ ماسەلەسى قاراستىرىلماق. ەكو تۋريزم ءتورت جىلدا ءۇش ەسە دامىعان. بۇگىن ايتىلعان ۇسىنىستار مەن شاعىمدار بويىنشا كەشەندى پىسىقتاۋ جۇمىستارى جۇرگىزىلەدى"، -دەپ تۇيىندەدى ەرمەك مارجىقپايەۆ.
قازاقستاندىق تۋريستىك اسسوسياسياسىنىڭ پرەزيدەنتى شايكەنوۆا راشيدا راشيد قىزى بۇگىنگى جيىندا تۋريزمگە قاتىستى ايتىلماعان ماسەلە قالماعانىن جەتكىزدى.
"بۇگىنگى فورۋمدا ءبىز مەملەكەتتىك ءتۋريزمدى دامىتۋعا دەگەن قىزىعۋشىلىق بايقالدى. بىزدە ەشۋاقىتتا ۇكىمەت باسشىسىنىڭ قاتىسۋىمەن وتكەن جيىن بولماعان جانە ونىڭ تۋريزم ماسەلەسىنە نازار اۋدارعانىن كورگەن ەمەسپىز. سول سەبەپتى دە بۇل فورۋم ەرەكشە. ەلدە مەملەكەتتىك قاتىسۋىنسىز تۋريزم ۇيىمداستىرۋ مۇمكىن ەمەس. ۆيزا، كولىك لوگيستيكاسى، اۋەتاسىمالداۋ قۇنى، جارناما، ەلدىك برەند سىندى ماسەلەلەر جۇيەگە قويىلعان كۇيدە تالقىلاندى. ينفراقۇرىلىمدىق شەشىمدەر، مىسالى جول بويىنداعى اجەتحانالار ماسەلەسى ايتىلدى. وننان اسا ماسەلە كوتەرىلدى. ەڭبەك نارىعىنىڭ ۇلكەن ۇلەسى مەن ۇكىمەتتىڭ قاتىسۋى ارقىلى ءبىز ناتيجە شىعارا الامىز. شەتەلدىك ماماندار تۋريستەر ءۇشىن تارتىمدى ەل بولۋ ءۇشىن "نە ىستەۋ كەرەك" دەگەن سۇراق بويىنشا كوپتەگەن جاقسى ۇسىنىستار ايتتى. سول سەبەپتى دە بۇگىنگى فورۋمنان ۇكىمەت باسشىسى جانە تۋريزم جانە سپورت ءمينيسترى بۇل سالاعا كۇش، قاراجات، جەرگىلىكتى جانە شەتەلدىك ينۆەستورلاردى تارتۋ كەرەك دەگەن تۇسىنىكپەن شىقتى دەگەن ۇمىتتەمىز. وتاندىق كاسىپكەرلەرگە قولداۋ كورسەتۋ ارقىلى جاقسى موتيۆاسيا بەرەدى".
ماڭعىستاۋ وبلىسىنىڭ اكىمى نۇرلان نوعايەۆ وڭىردە تۋريزم سالاسىن دامىتۋ بويىنشا قانداي جۇمىستار جۇرگىزىلىپ جاتقانىن ايتتى.
"التى ايدا وڭىرىمىزگە 179 مىڭ تۋريست كەلدى. كورشى وبلىستاردان كەلەتىن تۋريستەر سانى بۇل ستاتيستيكاعا كىرمەيدى. بىلتىرعا قاراعاندا تۋريستەر اعىنى 38 پايىزعا ارتىق. اقتاۋ اۋەجايىنان اپتاسىنا 147 رەيس، ونىڭ ىشىندە 45 شەتەلدىك رەيستەر جۇزەگە اسىرىلادى. 732 مىڭ جولاۋشى پويىزبەن تاسىمالداندى. بيىل 100 ميلليارد تەڭگە ينۆەستيسيا تارتىلىپ، 7 جوبا جۇزەگە اسىرىلادى. رەسپۋبليكالىق بيۋدجەتتەن 5 ميلليارد 400 مىڭ تەڭگە تۋريستىك مەكەمەلەرگە گاز تارتۋ ءۇشىن جۇمسالادى"، - دەيدى وبلىس اكىمى.
"قازاقتۋريزم" ۇق" اق باسقارما ءتوراعاسىنىڭ ورىنباسارى قايرات ءسادۋاقاسوۆ بۇل جيىننىڭ پاندەميالىق كەزەڭنەن كەيىن العاش رەت ءوتىپ جاتقانىن مالىمدەدى.
"ۇكىمەت باسشىسى تۋريزمگە قاتىستى ماسەلەلەردى بىلەدى، پرەزيدەتىمىزدە وسى سالاعا دەن قويۋىمىز كەرەكتىگىن ايتتى. بۇگىنگى فورۋمنىڭ ەرەكشەلىگى - تۋربيزنەسس پەن حالىقارالىق ۇيىم وكىلدەرى دىتتەگەن ماسەلەلەردى ۇكىمەت باسشىسىنا ايتا الدى. بۇگىن ايتىلعان ماسەلەلەردى جۇزەگە اسىرساق ايتارلىقتاي ناتيجە كورسەتەر ەدىك. كەلەر جىلى "كوشپەندىلەر ويىنىنا" بايلانىستى تۋريستىك برەند ازىرلەۋ تاپسىرىلدى. مۇنىڭ ءوزى الەمدىك نارىقتا قوزعاۋشى كۇش بولادى دەگەنگە سەنىمدىمىن. بارلىق قاتىسۋشىلارعا، اسىرەسە ديپميسسيا وكىلدەرىنە شەتەلدىك سەرىكتەستەرگە العىس ايتقىمىز كەلەدى. بۇگىن ەموسيونالدى ۇسىنىستار مەن تىلەكتەر بولدى، ويتكەنى ولار ءبىزدىڭ ەل ءۇشىن شىنايى جاناشىر بولا ءبىلدى. ەلىمىزدە تۋريزم ءۇشىن جايلى كليمات بولسا، شەتەلدىك ينۆەستورلار دا كوبەيىپ، قازاقستانعا كەلەتىن ساياحاتشىلار سانى ارتادى دەگەن سەنىمدەمىن"، - دەدى "قازاقتۋريزم" باسشىسى.
ماڭعىستاۋ وبلىسىندا تانىمال بلوگەر، ەكو-بەلسەندى ازامات سارسەنبايەۆ اتىراۋ مەن ماڭعىستاۋ وبلىستارىنىڭ جۇرتشىلىعىن سالىستىردى.
"ءبىزدىڭ وڭىردە ىشكى تۋريزم وتە جاقسى دامىعان. جاز باستالىسىمەن كورشىلەس وبلىستاردان، شەتەلدەن قوناقتار اعىلادى. اقتاۋ جۇرتشىلىعى كەز كەلگەن قوناقتى كۇتىپ الۋعا دايىن. وزدەرىڭىز كورىپ وتىرعانداي باستى دەگەن قوناقۇيلەر مەيماندارعا لىق تولى، جازعى ماۋسىم اياقتالعانشا ورىن جوق. ينفراقۇرىلىم جاقسارسا، حالىقتا سەرۆيسكە جاقىندايدى. مىسالى اتىراۋمەن سالىستىرار بولساق، ونداعى جۇرت شەتەلدىكتەرگە ۇيرەنگەن، و باستان ەكسپاتتار كوپ. بىزدە ءسال باسقاشا، بىرتىندەپ ۇيرەنىپ كەلەمىز. ۆانداليزم، قوقىستى كورىنگەن جەردە تاستاپ كەتۋ سىندى جاعدايلار بولىپ تۇرادى. ونداي ارەكەتتەرگە قارسى زاڭدى كۇشەيتىپ، ايىپپۇل سوماسىن ۇلعايتاتىن بولسا، نەمەسە ينفراقۇرىلىم جاقسارىپ جاتسا ونىڭ ەشكىم دە بۇلدىرگىسى كەلمەيتىنى انىق"، - دەيدى ەكو-بەلسەندى.