سەردار بەردىمۇحامەدوۆ قازاقستاندا قازان ايىندا كەلەدى.
قازان ايىندا تۇرىكمەنستان پرەزيدەنتى سەردار بەردىمۇحامەدوۆتىڭ قازاقستانعا مەملەكەتتىك ساپارى كۇتىلۋدە، دەپ حابارلايدى Almaty-akshamy.kz قازاقستاننىڭ سىرتقى ىستەر مينيسترلىگىنە سىلتەمە جاساپ.
ق ر ءسىم مالىمەتىنە سۇيەنسەك، قازاقستان سىرتقى ىستەر ءمينيسترىنىڭ ورىنباسارى ەرمۇحامبەت قونىسبايەۆ پەن تۇرىكمەنستان سىرتقى ىستەر ءمينيسترىنىڭ ورىنباسارى ۆەپا حادجييەۆتىڭ توراعالىعىمەن بەينەكونفەرەنسيا فورماتىندا قازاق-تۇرىكمەن ساياسي كونسۋلتاسيالارى ءوتتى.
«ءىس-شارا اياسىندا تاراپتار قازاقستان مەن تۇرىكمەنستان اراسىنداعى ەكىجاقتى جانە كوپجاقتى فورماتتاردا ىنتىماقتاستىقتى ودان ءارى دامىتۋدىڭ جاي-كۇيى مەن پەرسپەكتيۆالارى تۋرالى جان-جاقتى پىكىر الماستى.قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ 2021 جىلعى قازانداعى اشعابادقا مەملەكەتتىك ساپارىنىڭ قورىتىندىلارى بويىنشا قول جەتكىزىلگەن ۋاعدالاستىقتاردى ىسكە اسىرۋ جانە تۇرىكمەنستان پرەزيدەنتى سەردار بەردىمۇحامەدوۆتىڭ 2022 جىلعى قازانداعى قازاقستانعا مەملەكەتتىك ساپارىنا دايىندىققا، سونداي-اق تۇرىكمەن تاراپىنىڭ 6-شى اوسشك سامميتىنە، تمد مەملەكەتتەرى باسشىلارىنىڭ كەڭەسىنە جانە «ورتالىق ازيا - رەسەي» سامميتىنە قاتىسۋىنا ەرەكشە نازار اۋدارىلدى»، - دەلىنگەن حابارلامادا.
كونسۋلتاسيالاردىڭ قورىتىندىسى بويىنشا تاراپتار قازاقستان مەن تۇرىكمەنستان اراسىنداعى ستراتەگيالىق ارىپتەستىكتى ودان ءارى دامىتۋعا جاردەمدەسۋ ءۇشىن ەكى مەملەكەتتىڭ سىرتقى ساياسي ۆەدومستۆولارى اراسىنداعى بايلانىستاردىڭ جوعارى دەڭگەيىن قولداۋعا ۋاعدالاسقان.