تۇركيانىڭ انتاليا قالاسىنداعى Akdeniz ۋنيۆەرسيتەتىندە قازاقتىڭ ۇلى اقىنى تاڭجارىق جولدى ۇلىنىڭ 120 جىلدىق مەرەيتويىنا وراي حالىقارالىق ادەبي كونفەرەنسيا ءوتتى.
شارانى ۇيىمداستىرۋعا حالىقارالىق «تاڭجارىق-زەرتتەۋ قورى» قوعامى، دۇنيەجۇزى قازاقتارىنىڭ دامۋ قورى، Akdeniz ۋنيۆەرسيتەتى، ەۋرازيا جازۋشىلار وداعى جانە «تۇرىك وشاعى» بىرلەستىگى اتسالىستى، دەپ حابارلايدى Almaty-akshamy.kz قازاقپاراتقا سىلتەمە جاساپ.
كونفەرەنسيانىڭ باستى ماقساتى - تاڭجارىق جولدى ۇلىنىڭ ومىردەرەگى مەن شىعارماشىلىعىن ناسيحاتتاۋ، تۇرىك الەمىنە تانىستىرۋ، قازاق-تۇرىك ادەبي، مادەني بايلانىسىن نىعايتۋعا ۇلەس قوسۋ.
شارا بارىسىندا تۇرىك تىلىنە اۋدارىلعان 22 قازاق اقىنىنىڭ ولەڭدەرى مەن ءومىربايانى توپتاستىرىلعان جيناقتىڭ تۇساۋى كەسىلدى (توپتاستىرعان م. مامىتحان). «تاڭجارىق» جۋرنالى تانىستىرىلدى، قازاقستاننان بارعان اقىندار ولەڭدەرىن وقىدى، تاڭجارىق شىعارمالارىنا تالداۋ جاسالدى، ونەر ادامدارى تاڭجارىقتىڭ اندەرىن شىرقادى.
تۇركياداعى بەلگىلى جازۋشى، عالىم، قوعام قايراتكەرلەرى تاڭجارىق اقىننىڭ قيىن دا قيلى ومىرىنە توقتالىپ، شىعارمالارى، ارتىندا قالعان باي مۇرالارىنا تالداۋ جاساي وتىرىپ، «تاڭجارىق جولدى ۇلى - تۇركى الەمىنىڭ ورتاق قۇندىلىعى» دەگەن باعاسىن بەردى.
تاڭجارىق جولدى ۇلى – اقىن، 1903 جىلى ناۋرىزدىڭ 15 جۇلدىزىندا شىنجاڭ ىلە قازاق اۆتونوميالى وبلىسىنا قاراستى كۇنەس اۋدانىنداعى قامىستى دەگەن اۋىلدا دۇنيەگە كەلگەن. العاشقى ءبىلىم جولىن تۋعان اۋلىندا باستاعان، 1922-1925 جىلدارى قازاقستاندا كەگەن، نارىنقول اۋداندارىندا جەتىجىلدىق مەكتەپتە وقىعان. قازاق جازۋشىلارىنىڭ ەڭبەكتەرىمەن كەڭىنەن تانىس بولعان. ءوزى دە ولەڭ جازىپ، ايتىسقا قاتىسقان.
تاڭجارىق جولدى ۇلى شىڭجاڭدا ءمۇعالىم بولىپ قىزمەت اتقارعان، «ىلە» گازەتىندە رەداكتورلىق قىزمەت ىستەدى. كەيىننەن 1940-1946 جىلدارى قىتايداعى سولاقاي ساياساتتىڭ كەسىرىنەن تۇتقىندالىپ، تۇرمەگە جابىلعان. ونىڭ «جاستارىما»، «وسى تاڭ كىمنىڭ تاڭى؟»، «وقىپ كور گازەتىمدى»، «كوڭىلىم قالدى، تورىقتى»، «اباقتىدا كىم جاتىر؟»، «اقىن سىرى»، «ەلىمە» ولەڭدەرى وسى كەزدە جازىلعان. «وتكەن كۇندەرىم» (1942)، «قوشتاسۋ» (1941 - 1942)، «قاسقىر مەن ءبورىباسار» (1934 - 1943)، ت.ب. تولعاۋ جىرلارى مەن «نازيگۇل» (1943) داستانىنىڭ اۆتورى. «العاشكى جيناق» (قۇلجا، 1948)، «ارمانتاۋ» (1974) جيناقتارى جارىق كورگەن. 1947 جىلى اقىن ومىردەن وزدى.