2025 جىلى 30 قازان كۇنى ساعات 18:00-دە امستەردام قالاسىنداعى (نيدەرلاند كورولدىگى) تۇرىك مادەنيەتى ورتالىعىندا الماتى قالاسى مۋزەيلەر بىرلەستىگىنىڭ «ءداستۇر جالعاستىعى: بابالار اماناتى» اتتى كورمەسى اشىلادى. ءىس-شارا الماتى قالاسى اكىمدىگىنىڭ قولداۋىمەن جانە قازاقستان رەسپۋبليكاسىنىڭ نيدەرلاند كورولدىگىندەگى ەلشىلىگىمەن بىرلەسە ۇيىمداستىرىلىپ وتىر.
كورمەنىڭ نەگىزگى ماقساتى – قازاقستان مەن نيدەرلاند كورولدىگى اراسىنداعى مادەني بايلانىستى نىعايتۋ، سونداي-اق ۇلى دالا حالقىنىڭ باي تاريحىن، كوشپەلى وركەنيەتتىڭ مادەنيەتىن، قازاق حالقىنىڭ ءداستۇرلى تۇرمىسىن، فيلوسوفياسى مەن دۇنيەتانىمىن كەڭىنەن تانىستىرۋ.
ەكسپوزيسيادا الماتى قالاسى مۋزەيلەر بىرلەستىگىنىڭ قورىنان الىنعان 70-تەن استام بىرەگەي جادىگەر ۇسىنىلادى. ولاردىڭ اراسىندا قازاق حالقىنىڭ تۇرمىس-تىرشىلىگى مەن قولدانبالى ونەرىن بەينەلەيتىن ەتنوگرافيالىق بۇيىمدار، تاريحي فوتوسۋرەتتەر جانە قازاق پەن تۇركى حالىقتارىنىڭ مۋزىكالىق اسپاپتارى بار.
قازاقستان رەسپۋبليكاسى مەن نيدەرلاند كورولدىگى اراسىنداعى ديپلوماتيالىق قاتىناس 1992 جىلى 10 قىركۇيەكتە ورناتىلعان. امستەردامداعى تۇرىك مادەنيەتى ورتالىعى – تۇركى مادەنيەتى مەن ونەرىن الەمگە كەڭىنەن تانىتۋدى ماقسات ەتكەن بەدەلدى ۇيىم.
الماتى قالاسى مۋزەيلەر بىرلەستىگىنە قاراستى الماتى قالاسى تاريحى مۋزەيى – ەلىمىزدىڭ مادەني جانە قوعامدىق ومىرىنە بەلسەندى ۇلەس قوسىپ كەلە جاتقان زاماناۋي مادەني مەكەمەلەردىڭ ءبىرى. سوڭعى جىلدارى بىرلەستىك حالىقارالىق سەرىكتەستىك باعىتىندا ايتارلىقتاي تابىسقا قول جەتكىزدى.
مۋزەي قورلارىنداعى ەرەكشە توپتامالار بۇعان دەيىن سەۋل (كورەيا رەسپۋبليكاسى)، ىستامبۇل (تۇركيا)، نەاپول (يتاليا)، ۆەنا (اۆستريا)، پراگا (چەحيا)، كارساگ (ۆەنگريا) جانە بەلگراد (سەربيا) قالالارىندا تانىستىرىلدى.
2025 جىلى ماۋسىم ايىندا پاريج قالاسىندا (فرانسيا)، يۋنەسكو شتاب-پاتەرىندە وتكەن كورمە ۇلى كومپوزيتور، ديريجەر جانە كۇيشى نۇرعيسا تىلەندييەۆتىڭ 100 جىلدىعىنا ارنالدى.
«ءداستۇر جالعاستىعى: بابالار اماناتى» كورمەسى – ۇلى دالا مادەني مۇراسىن ەۋروپا حالقىنا تانىتاتىن، قازاق رۋحانياتى مەن تاريحىنىڭ تەرەڭ تامىرىن پاش ەتەتىن ماڭىزدى مادەني وقيعا بولماق.