اۋىل شارۋاشىلىعى ءمينيسترى ايداربەك ساپاروۆپەن كەزدەسۋ بارىسىندا Akplas وكىلدەرى حۋسەين اكىن مەن زۋبرەين اكىن جوبانىڭ ەگجەي-تەگجەيىن تالقىلادى.
تۇركيا رەسپۋبليكاسىنىڭ اۋىل شارۋاشىلىعى يرريگاسيالىق جۇيەلەرىنىڭ جەتەكشى ءوندىرۋشىسى قىزىلوردا وبلىسىندا زاۋىت سالادى. اۋدانى 22 گا جەر تەلىمى بولىنگەن، دەپ حابارلايدى aqshamnews.kz سالا مينيسترلىگىنە سىلتەمە جاساپ.
«مۇنداي كاسىپورىنداردىڭ قازاقستان اۋىل شارۋاشىلىعىن ءتيىمدى دامىتۋ ءۇشىن ماڭىزى زور. سۋارمالى ەگىنشىلىكتىڭ تيىمدىلىگىن ارتتىرۋ سۋدى ۇنەمدەۋ تەحنولوگيالارىن كەڭىنەن قولدانۋمەن تىعىز بايلانىستى، بۇل سۋ شىعىنىن ازايتۋعا جانە ونىمدىلىكتى ارتتىرۋعا مۇمكىندىك بەرەدى. بىزدە سۋ ۇنەمدەيتىن جابدىقتاردى ساتىپ الۋ ءۇشىن قولايلى جاعدايلار جاسالعان، ونىڭ ىشىندە فەرمەرلەر شىعىندارىنىڭ 80% - نا دەيىن سۋبسيديالاۋ ەسەبىنەن. ءبىز ءوز تاراپىمىزدان جوبانى ىسكە اسىرۋعا كومەك كورسەتۋگە دايىنبىز»، - دەپ اتاپ ءوتتى ايداربەك ساپاروۆ.
ءوز كەزەگىندە كومپانيا وكىلدەرى قازاقستاننىڭ تاعى بىرنەشە وبلىسىندا وسىنداي زاۋىتتار سالۋعا دايىن ەكەندىكتەرىن مالىمدەدى.
مينيستر رەسەيمەن شەكارالاس سولتۇستىك قازاقستان وبلىسىندا AKPLAS زاۋىتتارىن سالۋدىڭ ماڭىزدىلىعىن اتاپ ءوتتى، بۇل وسى ەلگە ءونىم جەتكىزۋدى ۇلعايتۋعا ىقپال ەتۋى مۇمكىن.
ايتا كەتەيىك، سۋارۋدىڭ سۋ ۇنەمدەۋ تەحنولوگيالارىن ەنگىزۋدى قولداۋ جونىندەگى شارالاردى ىسكە اسىرۋ جىل باسىنان بەرى ولاردىڭ قولدانىلۋ الاڭىن 72 مىڭ گەكتارعا ۇلعايتۋعا مۇمكىندىك بەردى. قازىرگى ۋاقىتتا قازاقستاندا سۋ ۇنەمدەۋ تەحنولوگيالارىن پايدالانا وتىرىپ، سۋارمالى جەرلەردىڭ جالپى اۋدانى 384 مىڭ گەكتاردى قۇرايدى.