تۇركسىب اۋدانىنىڭ اكىمى باقىتجان اقجاروۆ «نۇرشاشقان»، «مايك»، «اۋەجاي» شاعىناۋداندارىنىڭ تۇرعىندارىنا ەسەپ بەرىپ، اكىمدىكتىڭ اتقارعان جۇمىستارىن باياندادى. تۇرعىندار كوپتەن بەرى تولعاندىرعان، شەشىمى تابىلماعان سۇراقتارىن قويدى.
شارا بارىسىندا قالالىق باسقارمالار وكىلدەرى، قۇقىق قورعاۋ ورگاندارى مەن كوممۋنالدىق قىزمەت باسشىلارى بىرلەسىپ، ازاماتتاردى جەكە ماسەلەلەرى بويىنشا قابىلدادى.
اۋدان اكىمى 2020–2024 جىلدارعا ارنالعان «جاڭا الماتى» شەت ايماقتاردى دامىتۋ كەشەندى جوسپارىنىڭ قالاي جۇزەگە اسىرىلىپ جاتقانىن ايتىپ بەردى. باقىتجان اقجاروۆ «جاس قانات» شاعىناۋدانىن سۋمەن جابدىقتاۋ بويىنشا جسق ازىرلەنىپ، مەردىگەر انىقتالعانىن حابارلادى. «تومەنگى پياتيلەتكا» اۋماعىن سۋمەن جابدىقتاۋ بويىنشا جوبالىق-سمەتالىق قۇجاتتاما ازىرلەندى، مەردىگەر انىقتالدى، جوبانى ىسكە اسىرۋ مەرزىمى – 2022-2023 جىلدار. جوبامەن 4000-نان استام ءۇي قامتىلادى، 13،3 مىڭ تۇرعىن، جەلىلەردىڭ ۇزىندىعى 92،4 شاقىرىمدى قۇرايدى. ۇستىمىزدەگى جىلى اۋدانىمىزدا جوسپارلانىپ وتىرعان جۇمىستار جەتەرلىك. جول ينفراقۇرىلىمىن جاقسارتۋ، جاستار مەن بالالارعا ارنالعان سپورتىق الاڭداردى سالۋ. قالامىزدىڭ تابيعاتى مەن كوركىن جاقسارتۋ ماقساتىندا اعاشتار مەن گۇلدەر وتىرعىزۋ. كۇندەلىكتى تۇرمىستا قاجەتتىلىك تۋدىراتىن سۋ، جا- رىق، جول سىندى ماسەلەردى شەشەتىن بولامىز»، – دەپ تولىقتىردى تۇركسىب اۋدانىنىڭ اكىمى.
سونداي-اق، اۋداندا ينجەنەرلىك جەلىلەردى اعىمداعى جوندەۋ جۇمىستارى جۇرگىزىلۋدە. وتكەن جىلى 4،4 شاقىرىم سۋمەن جابدىقتاۋ جەلىسى، 2021 جىلى 700-دەن استام ءۇيدى (2800 تۇرعىن) قامتي وتىرىپ، 6،5 شاقىرىمى رەكونسترۋكسيالاندى.
«اكىمدىكتىڭ اتقارىپ جاتقان جۇمىستارىنا كوڭىلىمىز تولادى. حالىقتىڭ پىكىرىنە قۇلاق اسىپ، وزەكتى ماسەلەلەردى كوپپەن بىرگە شەشەدى. قاراپ وتىرساق، «نۇرشاشقان» شاعىناۋدانى جىل سايىن كوركەيىپ كەلە جاتىر. جولىمىز جوندەلدى، جارىق قويىلدى، جاڭا مەكتەپ قولدانىسقا بەرىلدى. قيراعالى تۇرعان كوپ قاباتتى ۇيلەرىمىز جوندەلىپ، جاڭا تۇرعىن ۇيلەر سالىندى. شاعىناۋداندا ءتۇرلى ۇلت وكىلدەرى بەيبىت ءومىر ءسۇرىپ جاتقان جايى بار»، – دەيدى اۋدان تۇرعىنى تۇرسىن اكيمجان. ءىس-شارا بارىسىندا اباتتاندىرۋ، قوعامدىق كولىك، حالىقتى ەڭبەكپەن قامتۋ، جاۋاپسىز مەردىگەرلەر جانە باسقا دا ماسەلەلەر كوتەرىلدى. ايتىلعان بارلىق ماسەلەلەر اۋدان باسشىلىعىنىڭ جەكە باقىلاۋىنا الىندى.