الماتىدا 2025 جىلى 17،1 ملرد تەڭگەگە «حالىق قاتىساتىن بيۋدجەت» جوبالارىن جۇزەگە اسىرۋ جالعاسادى
الماتىدا جەرگىلىكتى تۇرعىندارعا قالالىق ينفراقۇرىلىمدى جاڭارتۋ بويىنشا يدەياسىن جۇزەگە اسىرۋعا مۇمكىندىك بەرەتىن «حالىق قاتىساتىن بيۋدجەت» باعدارلاماسى ءساتتى ىسكە اسىرىلۋدا. ءۇش جىل ىشىندە مەگاپوليستە 39،1 ملرد تەڭگە سوماسىنا 938 جوبا جۇزەگە اسىرىلدى، دەپ حابارلايدى aqshamnews.kz
«حالىق قاتىساتىن بيۋدجەت» باعدارلاماسى تۇرعىنداردىڭ ۇسىنىسىن ەسكەرە وتىرىپ، جايلى قالالىق ورتا قۇرۋدىڭ ءتيىمدى قۇرالىنا اينالدى. الماتى اكىمدىگى ونىڭ دامۋىن قولداۋعا نيەتتى. 2025 جىلعى قالا بيۋدجەتىندە «حقب» جوبالارىنا 17،1 ملرد تەڭگە قاراستىرىلعان.
«حقب» باعدارلاماسى اياسىندا الاتاۋ اۋدانىنداعى قاراۋسىز قالعان بوس جەر كورىكتى سكۆەرگە اينالدى. جوبانىڭ اۆتورى گاۋحار شەرالييەۆانىڭ باستاماسىمەن جەرگىلىكتى تۇرعىندار اكىمدىكپەن تىعىز جۇمىس ىستەپ، اۋماقتى كوركەيتتى. جاياۋ جۇرگىنشىلەر جولدارى، اركالار، ورىندىقتار، دەمالىس ايماقتارى، جارىق شامدارى مەن اۆتوتۇراقتار سالىندى. سونداي-اق سكۆەرگە اعاشتار مەن بۇتالار وتىرعىزىلىپ، اۋداننىڭ كەلبەتى ايتارلىقتاي وزگەردى.
ناۋرىزباي اۋدانىندا تۇرعىندار اۋدان اكىمدىگىمەن بىرلەسىپ «شۇعىلا» تۇرعىن ءۇي كەشەنىنىڭ اۋماعىن تۇرلەندىردى. مۇندا بالالار جانە ۆوركاۋت الاڭدارى، باسكەتبول الاڭى، امفيتەاتر، دەمالىس ورىندارى، ورىندىقتار مەن اتكەنشەكتى بار «اربات» جاسالدى. بىرەگەي ساۋلەتتىك ستيلدەگى شاعىن فورمالار مەن جارىقتاندىرۋ تىرەكتەرى كەڭىستىكتى ەرەكشەلەي ءتۇستى.
اۋەزوۆ اۋدانىندا دا ءبىرقاتار جوبا جۇزەگە استى. جەرگىلىكتى تۇرعىنداردىڭ باستاماسىمەن 2-شاعىن اۋدانداعى اۋلا جانە 1-شاعىن اۋدانداعى قاراۋسىز قالعان اۋماق كورىكتەندىرىلدى. قوعامدىق كەڭىستىكتەردە اعاشتار مەن بۇتالار وتىرعىزىلىپ، سۋارۋ، جارىقتاندىرۋ جانە بەينەباقىلاۋ جۇيەلەرى ورناتىلدى.
«وتىنىشىمىزگە نازار اۋدارعان بيلىككە كوپ راحمەت. بىرنەشە ايدىڭ ىشىندە قاراۋسىز قالعان بۇل ۋچاسكە جايلى سكۆەرگە اينالدى»، – دەدى تۇرعىن لاريسا ميرگالييەۆا.
«حالىق قاتىساتىن بيۋدجەت» جوباسى قالالىق ينفراقۇرىلىمدى جاقسارتىپ، الماتىنىڭ بارلىق تۇرعىنى ءۇشىن جايلى ورتا قۇرۋعا سەپتىگىن تيگىزەدى.