«قىزىل جەبە» تاريحي سەريالى كورەرمەنگە جول تارتادى
مەملەكەت جانە قوعام قايراتكەرى تۇرار رىسقۇلوۆقا ارنالعان «قىزىل جەبە» اتتى تاريحي سەريالدىڭ ءتۇسىرىلىمى اياقتالدى، دەپ حابارلايدى Almaty-akshamy.kz.
Egemen.kz باسىلىمىنىڭ حابارلاۋىنشا، سسەناريي شەرحان مۇرتازانىڭ «قىزىل جەبە» شىعارماسى جەلىسىمەن جازىلعان.
فيلمدە تۇرار رىسقۇلوۆتىڭ ءرولىن سىرىم قاشقابايەۆ، اكەسى رىسقۇلدى ەركەبۇلان دايىروۆ، شەرحان مۇرتازانى الدابەك شالبايەۆ وينايدى. جوبانىڭ جەتەكشىسى، يدەيا اۆتورى – نۇرجان جالاۋ قىزى.
فيلمدە 20-شى عاسىردىڭ باسىنداعى پاتشالىق رەسەيدەن كەتكەننەن كەيىنگى قازاق مەملەكەتىنىڭ قالىپتاسۋ كەزەڭى باياندالادى. ءفيلمنىڭ باس پروديۋسەرى ءىلياس ىسقاقوۆ: "ماقساتىمىز سول كەزدەگى قازاق زيالىلارىنىڭ ەل ەرتەڭى ءۇشىن اتقارعان ەڭبەكتەرىن بۇگىنگى ۇرپاققا جەتكىزۋ بولدى"، - دەيدى.
«سول كەزدە تۇركىستان رەسپۋبليكاسىن جانە الاشوردا مەملەكەتىن قۇرۋ دەگەن ماسەلەلەر كوتەرىلدى. سول كەزدەگى تۇرار مەن الاشوردالىقتار اراسىنداعى كەلىسپەۋشىلىكتەر دە وسى فيلمدە ايتىلادى. دەگەنمەن نەگىزگى يدەيا رىسقۇلوۆتى سول كەزدەگى ۇلت جاناشىرلارىنان ءبولىپ-جارۋ ەمەس، بارلىعىنىڭ ويى قازاق ەلىن قالاي جەكە مەملەكەت ەتەمىز دەگەندەرىن كورسەتۋ بولدى. الاشوردا، تۇركىستان رەسپۋبليكاسى بولامىز دەگەندەردىڭ بارلىعى قازاقتىڭ بولاشاعىن، ەرتەڭىن ويلادى. جەر تۇتاستىعىن ساقتاپ قالۋ بولدى، مىنە، سول جولداعى قيان-كەسكى كۇرەسىن كورسەتكىمىز كەلدى»،- دەيدى ول.
سونىمەن قاتار ول تۇرار رىسقۇلوۆ جايلى بۇعان دەيىن ايتىلماي كەلگەن ءبىراز تىڭ دۇنيەلەر وسى فيلمدە كورسەتىلەتىنىن جەتكىزدى. اسىرەسە، تۇركىستان مەملەكەتىن قۇرۋ جولىندا تۇراردىڭ مۇحامەدجان تىنىشبايەۆ، مۇستافا شوقايمەن كەزدەسكەن ساتەتتەرى فيلمدە كورسەتىلەدى.
اقپارات جانە قوعامدىق دامۋ مينيسترلىگىنىڭ تاپسىرىسىمەن تۇسىرىلگەن اتالعان فيلم قازان ايىنىڭ 11-نەن باستاپ «Almaty» تەلەارناسىنان كورسەتىلەدى.